راجستھان کے 12 شہروں میں نائٹ کرفیو نافذ، کنٹینمنٹ زون میں 31 دسمبر تک لاک ڈاون

جے پور: کورونا وائرس (Coronavirus) وبا کے بڑھتے معاملوں کو دیکھتے ہوئے راجستھان حکومت نے یکم دسمبر سے 31 دسمبر تک کوٹہ، جے پور، جودھپور، بیکانیر، ادے پور، اجمیر، بھیل واڑہ، ناگور، پالی، ٹونک، سیکر اور گنگا نگر کے شہری علاقوں میں رات 8 بجے سے صبح 6 بجے تک نائٹ کرفیو کا اعلان کیا ہے۔ شام کو 7 بجے تک بازار، کام کرنے کے مقامات اور تجارتی احاطے بند کرنے کا حکم جاری کیا گیا ہے۔ اس کے ساتھ ہی 31 دسمبر 2020 تک کنٹینمنٹ زون میں لاک ڈاون نافذ رہے گا۔ صرف ضڑوری سرگرمیوں کی ہی اجازت دی جائے گی۔ حکومت کے ذریعہ تشکیل کی گئی ٹیموں کے ذریعہ گھر گھر نگرانی کی جائے گی۔

راجستھان حکومت کے احکامات کے مطابق، ریاست میں اسکول، کالج، تعلیمی ادارے اور کوچنگ سینٹر 31 دسمبر تک طلبا کے لئے بند رہیں گے۔ سنیما ہال، ملٹی پلیکس اور اس طرح کے بھیڑ بھاڑ والے مقامات بند رہیں گے۔ سماجی، سیاسی، کھیل، تہذیبی وثقافتی اور مذہبی مقامات اور بڑے انعقاد 31 دسمبر تک نہیں ہوں گے۔

راجستھان میں کورونا وائرس سے 18 لوگوں کی موت

راجستھان میں کورونا وائرس انفیکشن کے اتوار کو 2,581 نئے معاملے سامنے آئے ہیں۔ اس سے اب تک ریاست میں متاثرین کی کل تعداد بڑھ کر2,65,386 ہوگئی ہے۔ افسران نے بتایا کہ اتوار کی شام 6 بجے تک گزتہ 24 گھنٹوں میں ریاست میں کورونا وائرس انفیکشن سے 18 اور مریضوں کی موت ہوئی ہے، جس میں مرنے والوں کی تعداد اب بڑھ کر 2,292 ہوگئی۔

انہوں نے بتایا کہ کورونا وائرس انفیکشن سے اب تک جے پور میں 430، جودھپور میں 234، اجمیر میں 184، بیکانیر میں 161، کوٹہ میں 135، بھرت پور میں 104، ادے پور میں 93، اور پالی میں 89 مریضوں کی موت ہوچکی ہے۔ انہوں نے بتایا کہ ریاست میں اب تک کل 2,34,336 لوگ کورونا وائرس انفیکشن سے ٹھیک ہوچکے ہیں۔ اس کے ساتھ ہی اتوار کو انفیکشن کے 2,581 نئے معاملے سامنے آنے سے ریاست میں اس خطرناک وائرس سے متاثرین کی اب تک کی کل تعداد 2,65,386 ہوگئی، جن میں سے 28,758 مریض زیر علاج ہیں۔ نئے معاملوں میں جے پور میں 555، جودھپور میں 395، کوٹہ میں 211، اجمیر میں 164، الور میں 126، ادے پور میں 101، گنگا نگر میں 100، بھرت پور میں 99، ناگور میں 98 نئے مریض شامل ہیں۔