'میں کورٹ کا انچارج ہوں، میں ہی فیصلہ لوں گا....': ہم جنس شادی پر سی جے آئی اور مرکز میں زوردار بحث

نئی دہلی : سپریم کورٹ کی آئینی بینچ نے منگل سے ہم جنس شادی کے معاملے میں دائر درخواستوں کی سماعت شروع کی۔ کیس کی سماعت شروع ہوتے ہی ماحول گرم نظر آیا۔ مرکزی حکومت نے ان عرضیوں کی سماعت کے قابل قبول ہونے پر سوالات اٹھائے۔ سالیسٹر جنرل (ایس جی) تشار مہتا نے کہا کہ درخواستوں پر سماعت شروع ہونے سے قبل اس کے قابل قبول ہونے پر ان کے اعتراضات کو سنا جانا چاہئے۔ یہ معاملہ مکمل طور پر مقننہ کے دائرہ اختیار میں آتا ہے۔

حکومت کی جانب سے یہ اعتراض بھی اٹھایا گیا ہے کہ اس معاملے میں عدالتیں مداخلت کر سکتی ہیں یا یہ صرف پارلیمنٹ کا اختیار ہے۔ تاہم چیف جسٹس (سی جے آئی) ڈی وائی چندرچوڑ نے کہا کہ وہ اس معاملہ کو سمجھنے کے لئے پہلے عرضی گزاروں کی بات سننا چاہیں گے اور کچھ وقت تک عرضی گزار کو سننے کے بعد ہی حکومت کی بات سننا چاہیں گے۔

حالانکہ ایس جی نے پھر بھی اس پر اعتراض کیا۔ انہوں نے کہا کہ ان کی دلیل صرف یہ ہے کہ کون سا آئینی فورم اس معاملہ کو سن سکتا ہے اور وہ بھی اس کیس کے میرٹ پر نہیں، بلکہ اپنے ابتدائی اعتراضات بتانا چاہتے ہیں ۔ پھر سی جے آئی نے کہا کہ پہلے عرضی گزار کی بات سن لیں۔ اس پر ایس جی نے کہا کہ پہلے درخواست گزار حکومت کے ابتدائی اعتراضات کا جواب دیں۔

اس کے بعد سی جے آئی نے صاف طور پر کہا کہ وہ اس عدالت کے انچارج ہیں، اس لیے وہ یہ فیصلہ کریں گے۔ درخواست گزار کو پہلے سنا جائے گا۔ وہ کسی کو یہ بتانے کی اجازت نہیں دیں گے کہ اس عدالت میں سماعت کا عمل کیسے چلے گا۔

یہ بھی پڑھئے: کاشی کو ایک اور تحفہ، وارانسی سے پٹنہ کے بیچ چلے گا کروز، جانیں شیڈول

یہ بھی پڑھئے: مہاراشٹر میں پھر سیاسی ہلچل! شرد کو جھٹکا دیں گے اجیت پوار، 40 MLA کا ملا ساتھ

ایس جی مہتا نے کہا کہ اگر ایسا ہے تو حکومت یہ بھی دیکھے گی کہ وہ اس کیس کی سماعت میں حصہ لے گی یا نہیں۔ اس پر جسٹس سنجے کشن کول نے کہا کہ کیا آپ کہہ رہے ہیں کہ حکومت سماعت میں شرکت نہیں کرے گی۔ یہ بہت اہم مسئلہ ہے اور یہ اچھی بات نہیں کہ حکومت یہ کہے کہ وہ دیکھے گی کہ وہ سماعت میں شرکت کرے گی یا نہیں۔ اس کے بعد کہیں سے سماعت شروع ہوئی۔