آندھرا پردیش کے کرنول میں بس اور ٹرک میں زبردست ٹکر ، 13 افراد کی موت ، چار زخمی

آندھرا پردیش کے کرنول ضلع کے ولدورتی منڈل کے مدارپور گاوں کے نزدیک اتوار کی صبح بس اور ٹرک کے درمیان بھیانک ٹکر ہوگئی ، جس میں 13 افراد کی موت ہوگئی جبکہ چار دیگر افراد زخمی ہوئے ہیں ۔ موصولہ اطلاعات کے مطابق زخمیوں کو سرکاری جنرل اسپتال میں داخل کرایا گیا ہے ۔

کرنول کے ایس پی نے بتایا کہ حادثہ کے وقت گاڑی میں 18 افراد سوار تھے ۔ یہ حادثہ کرنول سے تقریبا 25 کلو میٹر کی دوری پر واقع مداپورم کے پاس ویلدورتی منڈل میں اتوار کو علی الصبح چار بجے پیش آیا ۔ اس حادثہ میں ڈرائیور کی بھی موت ہوگئی ۔

Andhra Pradesh: 13 people killed, 4 injured in a collision between a bus and a truck near Madarpur village in Veldurti Mandal, Kurnool district in the early morning hours; injured admitted to Government General Hospital pic.twitter.com/Ve1hHqTBkZ

— ANI (@ANI) February 14, 2021

موصولہ اطلاعات کے مطابق اس منی بس میں سوار 18 افراد چتور ضلع کے مدنا پللے سے راجستھان کے اجمیر جارہے تھے ، تبھی راستے میں تیز رفتار بس روڈ ڈیوائیڈر سے ٹکراگئی اور پھر اچھل کر دوسری جانب سے آرہی لاری میں ٹکرا گئی ۔ یہ حادثہ اتنا بھیانک تھا کہ لوگوں کی لاشیں اندر اس طرح سے پھنس گئی تھیں کہ انہیں نکالنے کیلئے مشینوں کو سہارا لینا پڑا ۔

اس حادثہ نے دو دن پہلے پیش آئے حادثہ کی یاد تازہ کردی ہے ۔ دو دن پہلے وشاکھا پٹنم ضلع یں اراکو کے پاس ایک بس بے قابو ہوکر گہرے گڑھے میں گر گئی تھی ۔ بس میں اس وقت 30 افراد سوار تھے ، جن میں سے آٹھ افراد کی موت ہوگئی تھی ۔