جوش وخروش اور آزادانہ طورپر ٹیپو جینتی منانے کی اجازت کا مطالبہ ، ضلع انتظامیہ کو میمورینڈم

رائچور :کرناٹک کے رائچور میں جنتا دل سیکولر، ڈسٹرکٹ ٹیپو سلطان سنگھ اوردیگر سماجی وملی تنظیموں نے ضلع انتظامیہ سے جوش وخروش اور آزادانہ طورپر ٹیپو جینتی منانے کی اجازت دینے کا مطالبہ کیا ہے۔ شہر کے بعض سماجی کارکنوں نے آج ڈپٹی کمشنر آفیس پہنچ کر اسسٹنٹ کمشنر کو ایک میمورنڈم پیش کیا ۔ جنتادل سیکولر ضلع اقلیتی سیل کے صدر محمد خواجہ اور ڈسٹرکٹ ٹیپو سلطان سنگھ کے لیڈر امیر بیگ نے کہا کہ ریاستی حکومت ٹیپو سلطان جینتی منانے کا تو اعلان کیا ہے ، لیکن دیگر جینتیوں کی طرح ٹیپو سلطان جینتی منانے میں ہچکچاہٹ محسوس کررہی ہے ۔

بتایا جارہا ہے کہ کھلے عام اور آزادانہ طورپر جینتی منانے پر روک لگانے کے لئے حکومت نے پولیس کو احکامات جاری کیے ہیں ۔ سماجی کارکنوں نے حال ہی میں کرناٹک اردو اکادمی کے رکن کی حیثیت سے نامزد ہونے پر رائچور کے معروف شاعر وادیب پروفیسر واحید واجد کوجینتی کے موقع پر تہنیت پیش کرنے اور ان کی جانب سے ٹیپو سلطان کی شان میں لکھی گئی نظم کو جینتی تقریب میں سنانے کا مطالبہ کی بھی کیا ۔ سماجی کارکنوں نے شہر میں لاء اینڈ آرڈر کو مدنظر رکھتے ہوئے پرامن طریقہ سے جینتی منانے کی مقامی عوام سے اپیل کی ہے۔