Controvercial Remark: سپریم کورٹ کا نوپور شرما کو تنبیہ کرنا خوش آئند : آل انڈیا مسلم پرسنل لا بورڈ

نئی دہلی : آل انڈیا مسلم پرسنل لا بورڈ کے جنرل سکریٹری مولانا خالد سیف اللہ رحمانی نے نوپور شرما کے سلسلہ میں سپریم کورٹ کے ریمارک پر خوشی کا اظہار کرتے ہوئے کہا ہے کہ عدالت نے جو کچھ کہا ہے اور ملزمہ کو جو تنبیہ کی ہے، وہ ملک کے تمام انصاف پسند شہریوں کے دل کی آواز ہے، لیکن ملزم کو سزا بھی ملنی چاہئے، اور اُن ایڈمنسٹریشن والوں پر بھی سوال اٹھتا ہے کہ جنھوں نے ملک کے مختلف حصوں میں ایف آئی آر درج ہونے کے باوجود ابھی تک اس پر کوئی کارروائی نہیں کی ہے ۔

 

یہ بھی پڑھئے: ہندوستان نے مذہبی آزادی کے معاملہ پر امریکہ رپورٹ کو کیا خارج، کہی یہ بڑی بات

کورٹ نے اس بات کو بھی واضح کر دیا کہ اودے پور کا واقعہ ان کے ناشائشتہ بیان کا رد عمل ہے، اس لئے صرف رد عمل پر کارروائی کرنا اور جو بات اس رد عمل کا سبب ہوئی، اس کو نظر انداز کر دینا سراسر انصاف کے خلاف ہے ۔

 

یہ بھی پڑھئے:  ملزمین کی جے پور کورٹ میں پیشی کے دوران پٹائی، کپڑے پھاڑے

انہوں نے کہا کہ جب تک ایسے لوگوں کے خلاف کارروائی نہیں ہوگی، سماج میں امن و امان اور بھائی چارہ قائم نہیں ہوگا اور باہر کی دنیا میں بھی وطن عزیز کی بدنامی ہوگی، اس لئے بورڈ حکومت سے اپیل کرتا ہے کہ وہ اس صورت حال کا سنجیدگی سے جائزہ لے ۔

انہوں نے مزید کہا کہ حکومت دستور کی بالادستی کو قائم رکھے اور ملک میں بسنے والی تمام قوموں کے ساتھ غیر جانبداری اور انصاف کا رویہ اختیار کرے۔