موسم ہوگا سہانا، ان ریاستوں میں اگلے دو دن آندھی ۔ بارش کا امکان، محکمہ موسمیات نے جاری کیا آرینج الرٹ

نئی دہلی : شدید گرمی کے قہر کو برداشت کررہے لوگوں کو بارش کی بوندا باندی سے بہت جلد راحت مل سکتی ہے۔ ہندوستان کے محکمہ موسمیات نے اگلے دو دنوں کے لئے آرینج الرٹ جاری کیا ہے، جس میں شمال مغربی ریاستوں میں تیز آندھی، بارش اور ژالہ باری کا الرٹ دیا گیا ہے۔ محکمہ موسمیات کے مطابق 23 سے 26 مئی تک ایک فعال ویسٹرن ڈسٹربنس کے پورے شمالی علاقے میں آگے بڑھنے کا قوی امکان ہے۔ بحیرہ عرب کے ساتھ ساتھ خلیج بنگال سے آنے والی ٹھنڈ ہوا کے باعث فضا میں نمی بڑھنے کی امید ہے، جس سے بارش ہونے کے امکانات مزید بڑھ جاتے ہیں۔ ایسے میں اگلے تین دنوں کے دوران شمال مغربی ہندوستان میں دن کے درجہ حرارت میں چار سے چھ ڈگری کی کمی آنے کی بھی امید ہے۔

سائنس دانوں نے بتایا کہ اس طرح کی آندھی  اور بارش پری مانسون کے دورانیے میں عام ہیں اور یہ زیادہ تر شمال مغربی ہندوستان کے ساتھ ساتھ شمال مشرقی ریاستوں کو بھی متاثر کرتے ہیں۔ اگرچہ اس مرتبہ سمندروں سے آنے والی ہواؤں کا اثر زیادہ ہی نظر آنے کا امکان ہے۔

آئی ایم ڈی کے سینئر سائنسدان ڈاکٹر سوما سین رائے نے نیوز 18 کو بتایا کہ بحیرہ عرب سے بڑی مقدار میں نم ہوا چلنے کی امید ہے۔ خلیج بنگال سے شمال مشرقی ہندوستان کی طرف تیز جنوب مغربی ہوائیں بھی چل رہی ہیں۔ یہ دونوں مل کر اس خطے میں بارش کی سرگرمیوں کو مضبوط بنا سکتے ہیں۔

ایسے میں اگلے چار دنوں کے دوران 23 مئی کی شام سے لے کر 26 مئی کی شام تک شمال مغربی ہندوستان میں کئی مقامات پر گرج چمک اور کبھی کبھار تیز ہواؤں کے ساتھ بارش ہونے کا امکان ہے۔ وہیں 24 اور 25 مئی کو اس کی شدت میں مزید اضافہ ہوسکتا ہے۔

یہ بھی پڑھئے: ہر آفت میں مدد کیلئے کھڑا رہتا ہے ہندوستان، سڈنی میں وزیراعظم مودی نے کہا

یہ بھی پڑھئے: بچھڑے بھائی-بہن 75 سالوں بعد کرتاپور کاریڈور میں دوبارہ ملے، سوشل میڈیا کے ذریعے ہوا یہ ممکن

بالخصوص ہماچل پردیش اور جموں کشمیر، لداخ، گلگت بلتستان کے بیشتر علاقوں میں موسلادھار بارش ہو سکتی ہے۔ وہیں اتراکھنڈ میں 50-60 کلومیٹر فی گھنٹہ کی رفتار سے تیز ہوائیں چلنے کا امکان ہے، جو 24 مئی کو پنجاب، ہریانہ، چندی گڑھ، دہلی اور 25 مئی کو مغربی اتر پردیش تک بڑھ سکتی ہے۔