مغربی بنگال: تشدد سے متاثرہ ہگلی میں حالات کنٹرول میں، کئی علاقو میں ابھی بھی کرفیو کا حکم

ہگلی : مغربی بنگال کے ہگلی ضلع میں تشدد سے متاثرہ رشڑا اور سیرام پور میں حالات پرامن اور قابو میں ہیں۔ لیکن کچھ علاقوں میں امتناعی احکامات نافذ ہیں اور انٹرنیٹ سروس پر پابندی پیر کو بھی جاری رہی۔ پولیس نے یہ اطلاع دی۔ چندن نگر پولیس کمشنریٹ کے ایک سینئر افسر نے بتایا کہ اتوار کی شام رام نومی جلوس کے دوران دو گروپوں کے درمیان تصادم کے سلسلے میں بارہ لوگوں کو گرفتار کیا گیا ہے۔

انہوں نے پی ٹی آئی ۔ بھاشا کو بتایا کہ صورتحال قابو میں ہے اور پرامن ہے۔ امتناعی احکامات نافذ ہیں اور پولیس کی بھاری نفری تعینات ہے۔ کچھ دیر کیلئے بازار کھولنے کی اجازت دی گئی تھی۔ ہم گاڑیوں کی نقل و حرکت پر بھی نظر رکھے ہوئے ہیں۔

افسر نے بتایا کہ صبح کچھ علاقوں میں کشیدگی تھی۔ ہم نے ہجوم کو منتشر کر دیا ہے اور سیکورٹی کے نظام کو مزید سخت کر دیا گیا ہے۔ امید ہے کہ صورتحال مزید بہتر ہو جائے گی ۔ افسر نے بتایا کہ صورتحال کا جائزہ لینے کے بعد ہی امتناعی احکامات ہٹانے اور انٹرنیٹ سروس بحال کرنے کا فیصلہ کیا جائے گا۔

پولیس نے بتایا کہ رشڑا تھانہ علاقہ میں رام نومی کے موقع پر دو جلوس نکالے گئے تھے اور ایک جلوس پر اتوار کی شام تقریباً 6.15 بجے جی ٹی روڈ پر واقع ویلنگٹن جوٹ مل موڑ کے قریب حملہ کیا گیا۔

یہ بھی پڑھئے: بزرگوں کی ریلوے رعایت کو لے کر کیجریوال نے لکھا وزیر اعظم نریندر مودی کو خط

یہ بھی پڑھئے: راہل گاندھی کو سورت کی سیشن عدالت سے مل گئی ضمانت، 13 اپریل کو ہوگی اگلی سماعت

انہوں نے کہا کہ سیرام پور کے رشڑا وارڈ 1-5 اور وارڈ نمبر 24 میں سی آر پی سی کی دفعہ 144 کے تحت امتناعی احکامات نافذ کیے گئے ہیں اور ضلع کے کچھ حصوں میں پیر کی رات 10 بجے تک انٹرنیٹ خدمات معطل رہیں گی۔