ہوم » نیوز » مغربی ہندوستان

حج سبسڈی کے خاتمہ کے بعد اب عازمین حج پر پڑسکتا ہے 18 فیصد جی ایس ٹی کا بوجھ ، ہٹانے کا مطالبہ

حج سبسڈی کے ختم ہونے کے بعد اب عازمین حج پر جی ایس ٹی کا بوجھ پڑسکتا ہے۔ مرکزی حج کمیٹی سے سفر حج پر روانہ ہونے والے عازمین حج کو 18 فیصد جی ایس ٹی اداکرنا پڑے گا ۔

  • ETV
  • Last Updated: Mar 22, 2018 01:17 PM IST
  • Share this:
  • author image
    NEWS18-Urdu
حج سبسڈی کے خاتمہ کے بعد اب عازمین حج پر پڑسکتا ہے 18 فیصد جی ایس ٹی کا بوجھ ، ہٹانے کا مطالبہ
فائل فوٹو

ممبئی : حج سبسڈی کے ختم ہونے کے بعد اب عازمین حج پر جی ایس ٹی کا بوجھ پڑسکتا ہے۔ مرکزی حج کمیٹی سے سفر حج پر روانہ ہونے والے عازمین حج کو 18 فیصد جی ایس ٹی اداکرنا پڑے گا ۔ حجاج کرام کی فلاح وبہبود کیلئے کام کرنے والی تنظیموں نے وزیراعظم نریندرمودی کو مکتوب روانہ کرتے ہوئے سفر حج پر سے جی ایس ٹی کو ہٹانے کا مطالبہ کیا ہے

یوں تو مرکزی حکومت حج سبسڈی کو ختم کرنے کے بعد بھی حج کوسستا کرنے کا دعوی کررہی ہے، لیکن وہیں، دوسری طرف،  سفر حج پر جی ایس ٹی عائد کرکے حج کو مزید مہنگا کرنے کی کوشش میں ہے۔ اگر سفر حج پر جی ایس ٹی عائد ہوتا ہے ، تو فی عازم 15 ہزار روپے سے زیادہ کی رقم اداکرنی پڑسکتی ہے۔ حج سیوا سمیتی اور ممبئی کی حج پلگریم شوشل ورکرس گروپ نے وزیراعظم کو خط لکھ کر سفر حج پر سے جی ایس ٹی ختم کرنے کی مانگ کی ہے۔


دوسری طرف، لوک سبھا میں سی پی ایم کے لیڈر محمد سلیم نے بھی مذہبی زیارتی سفر کو جی ایس ٹی سے مستثنیٰ کرنے کی تجویز کے ساتھ وزیر اعظم نریندر مودی کو ایک خط لکھا ہے۔ اپنے مکتوب میں سلیم نے ہندستانی عازمین حج کے سفرکو جی ایس ٹی سے مستثنیٰ کرنے کی درخواستوں پروزیر اعظم مودی سے ہمدردی سے غور کرنے کی درخواست کی ہے۔


انہوں نے اپنے خط کے ساتھ حج سیوا سمیتی کی اس عرضداشت کو بھی منسلک کیا ہے جس میں اس سلسلے کی مانگ کی گئی ہے۔ مارکسی رہنما نے کہا ہے کہ وزارت خزانہ کے قبل ازیں نوٹیفیکیشن کے باوجود شہری ہوابازی کی وزارت حاجیوں کو جی ایس ٹی ادا کرنے پر مجبور کر رہی ہے حالانکہ کماوں منڈل وکاس نگم اور حج کمیٹی جیسی تنظیموں کی طرف سے بالترتیب مان سروور یاترا اور سفر حج کو سروس ٹیکس سے مستثنیٰ رکھا گیا ہے۔
انہوں نے کہا کہ اس سال حج سبسڈی کے خاتمے کے ساتھ جی ایس ٹی کا نفاذ حاجیوں پر اخراجات کا بوجھ بڑھا دے گا۔ ایسے میں حاجیوں کو تقابلی کرائے پر سفر حج کرانے کے لئے عالمی ٹنڈر سے کام لیا جا نا چاہئے۔
ہندوستان سے ایک لاکھ 75 ہزار عازمین حج سعودی عرب کا سفر کریں گے ۔ ان میں سے ایک لاکھ 28 ہزار عازمین مرکزی حج کمیٹی کے توسط سے سفر حج پر روانہ ہوں گے ۔واضح رہے کہ گزشتہ سال عازمین حج پر 15 فیصد سروس ٹیکس عائد کیا گیا تھا ، لیکن سروس ٹیکس کی رقم حج سبسڈی سے اداکی گئی تھی، لیکن اب حج سبسڈی کے خاتمہ کے بعد جی ایس ٹی کا بوجھ براہ راست عازمین حج کو برداشت کرنا پڑے گا۔
تاہم جس طرح عام آدمی کی راحت کیلئے جی ایس ٹی میں ترمیمات کی گئی ہیں، اسی طرح حج پر سے بھی جی ایس ٹی ہٹانے کا مطالبہ زور پکڑرہا ہے۔ مہاراشٹر اسمبلی کے جاری اجلاس میں بی جے پی کے رکن اسمبلی اشیش شیلار نے بھی حج پر سے 18 فیصد جی ایس ٹی رد کرنے کا پرزور مطالبہ کیا ہے۔

نیوز ایجنسی یو این آئی، اردو کے ان پٹ کے ساتھ
First published: Mar 21, 2018 10:03 PM IST
corona virus btn
corona virus btn
Loading