شرد پوار بولے، مہاراشٹر کی 48 سیٹوں میں سے 45 پر کانگریس کے ساتھ سمجھوتہ طے

لوک سبھا انتخابات 2019 کے لئے سیاسی پارٹیوں کی سرگرمیاں تیز ہو گئی ہیں۔ مرکز کی بی جے پی حکومت کو اقتدار سے بے دخل کرنے کے لئے کانگریس سمیت مختلف پارٹیاں نئی سانٹھ گانٹھ میں جٹی ہیں۔ اترپردیش میں جہاں سماجوادی پارٹی اور بہوجن سماج پارٹی نے ایک ساتھ مل کر لوک سبھا الیکشن لڑنے کا اعلان کر دیا ہے تو وہیں مہاراشٹر میں نیشنلسٹ کانگریس پارٹی اور کانگریس کے درمیان گٹھ بندھن کو لے کر بات چیت مقام پر پہنچتی نظر آ رہی ہے۔

این سی پی سربراہ شرد پوار نے نیوز 18 کے ساتھ بات چیت میں کہا کہ نیشنلسٹ کانگریس پارٹی اور کانگریس سیٹوں کی شراکت داری کو حتمی شکل دینے پر پہنچ گئی ہیں۔ ہمارے درمیان مہاراشٹر کی 48 لوک سبھا سیٹوں میں سے 45 سیٹوں پر سمجھوتہ ہو چکا ہے۔

پوار نے کہا کہ این سی پی اپنے کوٹے سے ایک سیٹ راجیو شیٹی کو سوابھیمانی شیتکری تنظیم کو دے گی جبکہ کانگریس اپنے حصہ کی کچھ سیٹیں بایاں محاذ پارٹیوں کے لئے چھوڑے گی۔

یہ بھی پڑھیں: این سی پی صدر شرد پوار نے مسلم ریزرویشن کے معاملہ پر کہی یہ بڑی بات

وہیں، سابق وزیر اعلیٰ شرد پوار نے راج ٹھاکرے کی مہاراشٹر نو نرمان سینا کے ساتھ گٹھ بندھن کی قیاس آرائیوں کو بھی مسترد کر دیا۔ شرد پوار نے کہا کہ راج ٹھاکرے کے ساتھ ہم کوئی گٹھ بندھن نہیں کر رہے ہیں۔ انہوں نے کہا کہ ہمارے اور کانگریس کے درمیان سیٹوں کی شراکت داری کو لے کر کچھ ایشوز تھے جن میں سے زیادہ تر کو اب حل کر لیا گیا ہے۔ اب باقی بچی دو۔ تین سیٹوں پر بات چیت کر رہے ہیں۔