پروین توگڑیا کا متنازعہ بیان، کہا: اولاد سے محروم ہندوؤں کا علاج کرواکر بڑھائیں گے آبادی

ناسک  : اشتعال انگیز بیانات کے لئے مشہور وشو ہندو پریشد کے ایگزیکٹو چیئرمین پروین توگڑیا ایک بار پھر اپنے متنازعہ بیان کی وجہ سے سرخیوں میں ہیں ۔ ذات پات پر مبنی مردم شماری کی رپورٹ سامنے آنے کے بعد ہندوؤں کی آبادی کی شرح میں معمولی کمی پر توگڑیا نے کہا ہے کہ اب وہ ان ہندوؤں کا علاج کرائیں گے جو بچے پیدا کرنے کے اہل نہیں ہیں۔

توگڑیا کا یہ بیان ناسک کنبھ میں وی ایچ پی کے اجلاس کے دوران آیا ہے ۔ توگڑیا نے کہا کہ وہ ان ہندو خاندانوں کا علاج کرانا چاہتے ہیں جہاں کچھ بیماریوں کی وجہ سے بچے پیدا کرنے میں پریشانی ہوتی ہے۔ توگڑیا نے کہاکہ ہم ان کا علاج کراکر انہیں چار بچے پیدا کرنے کی ترغیب دیں گے ۔

تاہم ان کے اس بیان کی کانگریس سمیت کئی بڑی پارٹیوں نے شدید مذمت کی ہے ۔یہی نہیں سنت برادری میں بھی توگڑیا کے بیان پر تنقید کا دور شروع ہوگیا ہے۔ مہنت گیان داس نے ان کے اس بیان کی مذمت کرتے ہوئے کہا کہ ان کی فکر ہمیشہ ہندوؤں کو لے کر رہتی ہے ۔ سادھو سنتوں کے بارے میں وہ کبھی بات نہیں کرتے۔