ڈاکٹر ذاکر نائیک کی پریس کانفرنس ، اگر مثبت سوچ اور تعصب کے بغیر میرے بیانات کا تجزیہ کریں گے ، تو پائیں گے کہ میں امن کا پیغامبر ہوں

ممبئی : معروف اسلامی اسکالر ڈاکٹر ذاکر نائیک نے اسکائپ کے ذریعہ میڈیا سے بات چیت کی اور اپنے اوپر لگائے گئے تمام الزمات کو یکسرمسترد کردیا ۔ ذاکر نے کہا کہ میڈیا نے میرے بیانات کو توڑ دیا مروڑکر پیش کیا اور اس کو اپنے پس منظر سے ہٹ کر پیش کیا۔ میری تقریروں کے ساتھ چھیڑ چھاڑ کی گئی۔
ڈاکٹر ذاکر نائیک نے تمام طرح کے دہشت گردانہ واقعات کی مذمت کی اور کہا کہ اگر آزاد سوچ اور کسی تعصب کے بغیر میرے بیانات کا تجزیہ کریں گے ، تو پائیں گے کہ میں امن کا پیغامبر ہوں۔
ہندوستان کی میڈیا کو نشانے پر لیتے ہوئے ڈاکٹر ذاکر نائیک نے کہا کہ وہ میرا ٹرائل کر رہا ہے۔ جس اخبار نے ڈھاکہ حملے کو لے کر مجھ الزام لگایا تھا ، اس نے بعد میں اس میں اصلاح کرلی اور اپنی خبر کو واپس لے لیا ۔ اگر آپ میری ریکارڈنگ کو غور سے سنیں گے ، تو آپ کو سبھی جوابات مل جائیں گے ۔ ویڈیو کلپس کو ادھورا دکھایا گیا ، یا پھر ان سے چھیڑ چھاڑ کی گئی۔ اگر آپ مجھ سے وضاحت چاہتے ہیں تو میں آپ کو مکمل جواب پین ڈرائیو میں بھی دوں گا۔
خیال رہے کہ اس سے قبل کئی مرتبہ ڈاکٹر ذاکر نائیک کی مختلف وجوہات کی وجہ سے پریس کانفرنس ملتوی کی گئی ۔ پہلے 12 جولائی کو ممبئی کے ٹرائيڈنٹ ہوٹل میں پریس کانفرنس ہونے والی تھی ، لیکن وہ پریس کانفرنس منسوخ کر دی گئی۔ اس کے بعد پھر 14 جولائی کی صبح ساڑھے 11 بجے ورلڈ ٹریڈ سینٹر میں پریس کانفرنس ہونی تھی ، لیکن ہوٹل کے ذریعہ منع کئے جانے کے بعد اس کو بھی منسوخ کر دیا گیا۔