ورلڈ کپ 2019: رو پڑا یہ زبردست بلے باز، کہا۔ فٹ تھا پھر بھی زخمی بتا کر کر دیا عالمی کپ سے باہر

افغانستان کے وکٹ کیپر محمد شہزاد نے اپنے ملک کے بورڈ پر آئی سی سی کرکٹ ورلڈ کپ 2019 سے باہر کرنے کا الزام لگایا ہے۔ انہوں نے کہا کہ وہ پوری طرح سے فٹ ہیں اس کے بعد بھی انہیں زخمی بتاتے ہوئے ورلڈ کپ 2019 سے واپس بلا لیا گیا ہے۔

انہوں نے اسپورٹ اسٹار سے بات چیت میں کہا’’ میں نیٹس میں پریکٹس کر رہا تھا تبھی ٹیم منیجر نے مجھے بلایا اور کہا کہ میں ان فٹ ہوں اور مجھے واپس گھر جانا پڑے گا۔ ایسا لگتا ہے کہ انہوں نے پہلے سے ہی میرے ریپلیسمنٹ( اکرام علی ) کو بلا لیا تھا لیکن مجھے نہیں پتہ تھا کہ میں ان فٹ ہوں‘‘۔

تاہم افغانستان کرکٹ بورڈ نے ان الزامات کو مسترد کر دیا ہے۔ شہزاد افغانستان کے وکٹ کیپر بلے باز ہیں اور وہ ٹیم کے لئے بلے بازی کی شروعات بھی کرتے ہیں۔ حالانکہ ورلڈ کپ کے پہلے دو میچوں میں وہ بری طرح سے ناکام رہے تھے۔ آسٹریلیا کے خلاف صفر اور سری لنکا کے خلاف وہ 7 رن ہی بنا سکے تھے۔

بتا دیں کہ شہزاد  افغانستان کی طرف سے آسٹریلیا اور سری لنکا کے خلاف میچ میں کھیلے تھے۔ بتایا جاتا ہے کہ انہیں پاکستان کے خلاف وارم اپ میچ میں گھٹنے میں چوٹ لگی تھی۔ اس بارے میں آئی سی سی کی طرف سے جاری بیان میں کہا گیا تھا کہ شہزاد کی چوٹ بڑھ گئی تھی ایسے میں انہیں ٹورنامنٹ چھوڑنا پڑا۔