ایشیا کپ 2018: وسیم اکرم نے ہندستان جبکہ گواسکر نے پاکستان کو فیورٹ قرار دیا

نئی دہلی: وسیم اکرم نے موجودہ ایشیا کپ میں ہندوستانی ٹیم کو مضبوط قرار دیا ہے،جبکہ سابق ہندستانی کرکٹر اورمبصر سنیل گواسکرنے پاکستان کو فیورٹ کہا ہے۔

ہندستانی ٹی وی کے معروف پروگرام میں گفتگو کرتے ہوئے لیجنڈری فاسٹ بولر وسیم اکرم کا کہنا تھا کہ کوہلی کی عدم موجودگی میں بھی کاغذ پرہندوستان کو مضبوط سمجھتا ہوں، البتہ پاکستانی گیندباز کو کوہلی کی عدم موجودگی کا فائدہ اٹھائیں گے۔

دوسری جانب سنیل گواسکر نے کہا کہ ہمسایہ ملک پاکستان کا چمپئنز ٹرافی فائنل جیتنے کے بعد حوصلہ بلند ہے، اس لئے وہ 19 ستمبر کے میچ میں فیورٹ ہوں گے۔

پاکستانی کرکٹ ٹیم کے چیف سلیکٹر انضمام الحق کا کہنا ہے کہ پاکستان کا ہندوستان کے ساتھ کہیں بھی مقابلہ ہو زبردست ہوتا ہے، کل بھی پاکستان اور ہندستان کا زبردست مقابلہ ہوگا۔ وراٹ کوہلی کے نہ ہونے سے پاکستان کو نہیں ہندستان کو فرق پڑے گا۔

انضمام الحق نے کہا کہ پاکستان کو اپنی حکمت عملی کے سا تھ کھیلنا چاہئے۔ پاکستان کرکٹ ٹیم کے سابق تیز گیندباز شعیب اختر کا کہنا ہے کہ متحدہ عرب امارات کی کنڈیشنز کا پاکستان کو فائدہ ہو گا۔ ہندوستان پر چمپئنز ٹرافی کے فائنل کی شکست کا خو ف ہو گا اس لئے پاکستان ٹیم کو نفسیاتی برتری حاصل ہے۔

ہند- پاک میچ کے حوالے سے سوئنگ کے سلطان وسیم اکرم نے کہا کہ ہند پاک میچوں کی ٹینشن گراونڈ میں ضرور ہوتی ہے، لیکن کھیل کے میدان کے باہرسب دوست ہیں، ساتھ کھانا بھی کھاتے ہیں۔ سابق کپتان وسیم اکرم نے کہا کہ ہند - پاک کھلاڑی میدان میں آخری گیند تک لڑتے ہیں۔