دبئی میں ہوگا ایشیا کپ، ہندوستان اور پاکستان کے درمیان کھیلا جائے گا مقابلہ

کولکاتا: اس سال ہونے والے ایشیا کپ کے انعقاد کے مقام کو لےکر کافی وقت سے تعطل بنا ہوا تھا۔ ٹورنامنٹ کی میزبانی پاکستان کو ملی تھی۔ مگر سیکورٹی وجوہات اور پڑوسی ملک سے خراب رشتے کے سبب ٹیم انڈیا نے پاکستان کا دورہ کرنے سے صاف منع کردیا تھا، جس سے انعقاد کی چمک پھیکی پڑتی نظر آرہی تھی۔ اسی کو دھیان میں رکھتے ہوئے اب پاکستان کے بجائے ایشیا کپ کا انعقاد دبئی میں ہوگا۔ وہیں ہندوستان اور پاکستان کے درمیان مقابلہ بھی کھیلا جائےگا۔ بی سی سی آئی صدر سوربھ گانگولی نے جمعہ کوکہا کہ ایشیا کپ دبئی میں ہوگا۔ انہوں نےکہا کہ ہندوستان اور پاکستان دونوں ممالک کو اس ٹورنامنٹ میں چیلنج پیش کرنےکا موقع ملےگا۔

دراصل پہلے پاکستان میں اس ٹورنامنٹ کا انعقاد ہونا تھا، مگر بی سی سی آئی نے واضح کردیا تھا کہ سیکورٹی وجوہات کے سبب ہندوستانی ٹیم پاکستان کا دورہ نہیں کرے گی۔ اس کے بعد یہ قدم اٹھایا گیا۔ آئندہ ماہ 3 مارچ کو ایشین کرکٹ کونسل کی دبئی میں میٹنگ ہونی ہے اور دبئی روانہ ہونےسے پہلے بی سی سی آئی صدرگانگولی نے ایڈن گارڈن پر ہوئی پریس کانفرنس میں اس بات کی تصدیق کی۔ انہوں نےیہ بھی واضح کردیا ہےکہ بی سی سی آئی کو اس میں کوئی پریشانی نہیں ہےکہ ٹورنامنٹ کی میزبانی پاکستان کرےگا۔

ستمبر میں ہوگا ایشیا کپ

دونوں ممالک کے درمیان گزشتہ کچھ وقت سے چل رہے خراب رشتوں کا اثرکرکٹ پر بھی پڑا ہے اور دونوں ممالک کے درمیان 2013-2012 کے بعد سے کوئی دو طرفہ سیریز نہیں کھیلی گئی۔ دونوں ٹیموں کے درمیان مقابلہ صرف آئی سی سی ٹورنامنٹ میں ہی دیکھنےکو ملتا ہے۔ ایشیا کپ کا انعقاد ستمبر میں ہوگا۔ 6 ممالک کے اس ٹورنامنٹ میں ہندوستان خطاب بچانے اترےگا۔

شاندار چل رہا ہے ٹیم انڈیا کا سفر

اس موقع پر بی سی سی آئی صدر نے ہرمن پریت کورکی کپتانی والی ہندوستانی خاتون ٹیم کو ٹی -20 عالمی کپ کے سیمی فائنل میں پہنچنے پر مبارکباد دی۔ بی سی سی آئی صدر نے کہا کہ وہ شاندار کرکٹ کھیل رہی ہیں اور انہوں نے سیمی فائنل کا ٹکٹ پکا کیا۔ اس عالمی کپ میں کوئی ایک ٹیم دعویدار نہیں ہے۔ ہندوستانی ٹیم شاندار ہے، دیکھتے ہیں ٹورنامنٹ میں ان کا سفر کہاں تک رہتا ہے۔