CWG 2022:مرلی شری شنکر نے رقم کی تاریخ، لانگ جمپ میں سلور میڈل جیتنے والے پہلے ہندوستانی مرد ایتھلیٹ

CWG 2022:ہندوستان کے لانگ جمپر مرلی شری شنکر نے ٹریک اینڈ فیلڈ میں ہندوستان کو دوسرا تمغہ دلایا ہے۔ شری شنکر نے مردوں کے لانگ جمپ کے فائنل میں 8.08 میٹر کی بہترین چھلانگ لگا کر چاندی کا تمغہ جیتا۔ اس کے ساتھ ہی شری شنکر کامن ویلتھ گیمز کی تاریخ میں لانگ جمپ ایونٹ میں ہندوستان کے لیے چاندی کا تمغہ جیتنے والے ہندوستان کے پہلے مرد کھلاڑی بن گئے ہیں۔
اس سے قبل خواتین کی سابق ایتھلیٹس انجو بوبی جارج اور پرجیوشا ملایکھل تمغے جیت چکی ہیں۔ انجو بوبی نے 2002 کے کامن ویلتھ گیمز میں لمبی چھلانگ میں کانسہ اور پرجیوشا نے 2010 کے کامن ویلتھ گیمز میں چاندی کا تمغہ جیتا تھا۔ اسی وقت سریش بابو نے 1978 کے کامن ویلتھ گیمز میں مردوں میں کانسہ کا تمغہ جیتا تھا۔ لمبی چھلانگ میں پرجیوشا کے بعد ہندوستان کا یہ دوسرا چاندی کا تمغہ ہے۔

ساتویں دن ہندوستان کے لئے پہلا میڈل
شری شنکر کا تمغہ ساتویں دن ہندوستان کا پہلا تمغہ تھا۔ شری شنکر کے بعد پیرا پاور لفٹر سدھیر نے گولڈ میڈل جیتا۔ اس سے قبل چار ہندوستانی باکسر سیمی فائنل میں پہنچے اور ہندوستان کے لئے چار تمغے بھی یقینی بنائے۔ امیت پنگھال، ساگر اہلاوت، مردوں کی باکسنگ میں روہت ٹوکس اور خواتین کی باکسنگ میں جیسمین نے سیمی فائنل میں جگہ بنا لی ہے۔ برمنگھم کامن ویلتھ گیمز میں مجموعی طور پر سات ہندوستانی باکسر اپنے اپنے مقابلوں میں سیمی فائنل میں پہنچ چکے ہیں۔ برمنگھم میں ہندوستان نے اب تک کل 20 تمغے جیتے ہیں۔ ان میں چھ سونے، سات چاندی اور سات کانسہ کے تمغے شامل ہیں۔

یہ بھی پـڑھیں:

کرکٹر بھائی اور بھابھی نے ٹیم کو بنایا ورلڈ چیمپن، چھوٹے بھائی نے CWG 2022 میں مچایا دھمال

یہ بھی پـڑھیں:
Asia Cup 2022: ایشیا کپ کے لئے پاکستانی ٹیم کا اعلان، بابر اعظم ہی سنبھالیں گے کمان

شری شنکر کا تمغہ برمنگھم کامن ویلتھ گیمز میں ٹریک اینڈ فیلڈ میں ہندوستان کا دوسرا تمغہ ہے۔ اس سے قبل تیجسون شنکر نے اونچی چھلانگ میں ہندوستان کے لیے کانسہ کا تمغہ جیتا تھا۔ مرلی شری شنکر نے اپنی پہلی تین کوششوں میں 7.84 میٹر کی بہترین کارکردگی کا مظاہرہ کیا۔ شری شنکر نے پہلی کوشش 7.60 میٹر، دوسری کوشش 7.84 میٹر اور تیسری کوشش 7.84 میٹر کی۔ شری شنکر پہلی تین کوششوں کے بعد چھٹے نمبر پر تھے۔