بارش کی وجہ سے تیسرا ون ڈے میچ رد، 41 سال بعد نیوزی لینڈ نے ہندوستان کو لگاتار دو سیریز میں ہرایا

نئی دہلی : کین ولیمسن کی قیادت میں نیوزی لینڈ کی ٹیم نے ون ڈے سیریز 1-0 سے جیت لی ہے۔ تیسرے اور آخری میچ میں کیوی ٹیم اچھی پوزیشن میں تھی ۔ تاہم یہ میچ بارش کی وجہ سے منسوخ ہو گیا ۔ اس سے پہلے کیوی ٹیم نے پہلا میچ 300 سے زیادہ رنز بنا کر جیتا تھا جبکہ دوسرا میچ بارش کے باعث منسوخ ہوگیا تھا ۔ وہیں ٹی 20 سیریز ٹیم انڈیا نے 1-0 سے جیتی تھی ۔ اس طرح نیوزی لینڈ نے ٹی ٹوینٹی سیریز میں شکست کا بدلہ بھی لے لیا ۔ تیسرے ون ڈے میں ہندوستانی ٹیم پہلے کھیلتے ہوئے صرف 219 رنز بنا سکی ۔ واشنگٹن سندر نے سب سے زیادہ 51 رنز بنائے۔ جواب میں نیوزی لینڈ نے 18 اوورز میں ایک وکٹ پر 104 رنز بنا لئے تھے جب بارش کی وجہ سے کھیل روکا گیا تھا۔ ڈیون کانوے 38 اور ولیمسن 0 رنز بنا کر ناٹ آؤٹ رہے۔

ون ڈے سیریز جیتنے کے ساتھ ہی نیوزی لینڈ نے 41 سال پرانا ریکارڈ ایک بار پھر دوہرا دیا ۔ کیوی ٹیم نے ہندوستان کے خلاف مسلسل دوسری ون ڈے سیریز جیتی ۔ اس نے پچھلی سیریز میں 3-0 سے کامیابی حاصل کی تھی۔ اس سے پہلے یہ کارنامہ نیوزی لینڈ میں 1981 میں انجام دیا گیا تھا۔ ہدف کے تعاقب میں نیوزی لینڈ کو سلامی بلے باز ڈیون کانوے اور فن ایلن نے شاندار آغاز فراہم کیا۔ دونوں نے پہلی وکٹ کے لیے 16.3 اوورز میں 97 رنز جوڑے۔ ایلن 54 گیندوں پر 57 رنز بنانے کے بعد تیز گیند باز عمران ملک کا شکار بنے۔ انہوں نے 8 چوکے اور ایک چھکا لگایا۔

یہ بھی پڑھئے : بڑی خبر!انگلینڈ اور پاکستان کے درمیان پہلے ٹیسٹ پر خطرہ،انگلینڈ کے آدھا درجن کھلاڑی بیمار

یہ بھی پڑھئے: 'اگر ہندوستان ۔ پاکستان میچ نہیں ہوتا تو....' پاکستان کے سابق کرکٹر نے دیا بڑا بیان

اس سے پہلے بلے بازوں کی ناقص کارکردگی کی وجہ سے ہندوستانی ٹیم آخری ون ڈے میں 47.3 اوورز میں 219 رنز پر ڈھیر ہوگئی ۔ آدھی ٹیم 25.3 اوورز میں پویلین لوٹ چکی تھی۔ صرف واشنگٹن سندر (64 گیندوں میں 51 رنز، 5 چوکے اور 1 چھکا) ہی نصف سنچری اننگز کھیل سکے، جس کی وجہ سے ٹیم 200 رنز کا ہندسہ عبور کرنے میں کامیاب رہی۔

اس اسپن آل راؤنڈر نے پہلے ون ڈے میں بھی ہندوستان کے 7 وکٹوں پر 306 رنز کی اننگز میں 16 گیندوں پر ناٹ آوٹ 37 رنز بناکر اپنی قابلیت کا مظاہرہ کیا تھا ۔