IPL Auction 2021: ارجن تیندولکر کو مل گیا خریدار ، پہلی مرتبہ لیگ میں کھیل چکے کھلاڑی کے بیٹے کو ملا موقع

ارجن تیندولکر کو آئی پی ایل 2021 کی نیلامی میں ممبئی انڈینس نے 20 لاکھ روپے میں خریدا ہے ۔ ان کا بیس پرائز 20 لاکھ روپے ہی تھا ۔ اگر انہیں موجودہ سیزن میں کھیلنے کا موقع ملتا ہے تو وہ لیگ میں کھیلنے والے کسی کھلاڑی کے پہلے بیٹے ہوں گے ۔ ارجن تیندولکر کے والد سچن تیندولکر بھی آئی پی ایل میں ممبئی انڈینس کی جانب سے کھیل چکے ہیں ۔ اس سے پہلے ارجن کو ٹی 20 مشتاق علی ٹرافی میں ممبئی کی جانب سے کھیلنے کا موقع ملا تھا ۔

ارجن تیندولکر بائیں ہاتھ کے تیز گیند باز کے علاوہ بلے بازی بھی کرتے ہیں ۔ 21 سال کے اس کھلاڑی نے اب تک صرف دو ہی ٹی ٹوینٹی مقابلے کھیلے ہیں ۔ اس دوران انہوں نے تین رن بنائے ہیں اور دو وکٹ لئے ہیں ۔ انہوں نے ہریانہ کے خلاف مشتاق علی ٹرافی میں 34 رن دے کر ایک وکٹ لیا تھا ۔ اس کے علاوہ پڈوچیری کے خلاف ارجن نے 33 رن دے کر ایک وکٹ لیا تھا ۔

حالانکہ ارجن تیندولکر کے آئی پی ایل نیلامی کی فہرست میں آنے کے بعد کئی لوگ اس بات کو لے کر تنقید کررہے تھے کہ وہ سچن کے بیٹے ہیں ۔ اب ان کے بکے جانے کے بعد ایک مرتبہ پھر اس معاملہ پر بحث تیز ہوسکتی ہے ۔ حالانکہ کئی دیگر ملک کے باپ اور بیٹے ٹی ٹوینٹی میں کھیل چکے ہیں ۔ پاکستان کے معین خان کے بیٹے اعظم خان اور جنوبی افریقہ کے مکھایا اینٹنی کے بیٹے تھانڈو اینٹنی بھی کھیل چکے ہیں ۔

آئی پی ایل 14 کی نیلامی اس مرتبہ کئی ہندوستانی کھلاڑیوں کو راس آئی ۔ ممبئی کے بائیں ہاتھ کے میڈیم تیزگیند باز شیوم دوبے کا بیس پرائس 50 لاکھ تھا اور انہیں راجستھان رائلس نے 4.40 کروڑ روپے کی قیمت پر خریدا ۔ تمل ناڈو کے آف اسپنر شاہ رخ خان کو پنجاب کنگز نے 5.25 کروڑ میں خریدا تھا ، جبکہ ان کا بیس پرائس 20 لاکھ روپے تھا ۔ چیتن سکریا ایک اور ایسے کھلاڑی تھے ، جنہیں راجستھان کی ٹیم نے 1.20 کروڑ کی قیمت میں خریدا ۔

ہندوستان کے ٹیسٹ ماہر بلے باز چیتشور پوجارا کو آخر کار آئی پی ایل میں خریدار مل گیا ہے ۔ پجارا 2014 میں پنجاب کی طرف سے کھیلنے کے بعد آئی پی ایل میں واپسی کریں گے ۔ چنئی نے انہیں 50 لاکھ روپے کی قیمت پر خریدا ہے ۔