Cricket News: سہواگ اور گنگولی پھر اتریں گے میدان پر، پاکستان کے کھلاڑی آئیں گے ہندوستان

نئی دہلی : سوربھ گنگولی 7 سال بعد ایک مرتبہ پھر کرکٹ کے میدان میں واپسی کرنے کے لئے تیار ہیں۔ سابق کپتان اور بی سی سی آئی کے موجودہ صدر گنگولی لیجنڈز کرکٹ لیگ میں کھیلتے ہوئے نظر آئیں گے۔ گزشتہ دنوں انہوں نے سوشل میڈیا کے ذریعہ بتایا تھا کہ وہ آزادی کے 75 سال مکمل ہونے پر ایک چیریٹی میچ میں اتریں گے۔ لیگ نے تصدیق کی ہے کہ انگلینڈ کے سابق کپتان ایون مورگن، وریندر سہواگ، متھیا مرلی دھرن، مصباح الحق، جونٹی روڈز، مچیل جانسن، بریٹ لی، شین واٹسن، راس ٹیلر اور ڈیل اسٹین جیسے 53 کھلاڑی اب تک لیگ میں شامل ہو نے راضی ہوچکے ہیں ۔

 

یہ بھی پڑھئے: ہندوستان اور ویسٹ انڈیز کے درمیان دوسرے T20 میچ میں دو گھنٹے کی تاخیر

کرک انفو کی خبر کے مطابق ٹورنامنٹ کے میچز 17 ستمبر سے 8 اکتوبر تک ہندوستان کے 5 شہروں میں کھیلے جائیں گے۔ اس میں کولکاتہ، لکھنؤ، دہلی، جودھپور اور کٹک اور راجکوٹ شامل ہیں ۔ جانکاری کے مطابق پاکستان کے کھلاڑی حکومت ہند کی اجازت کے بعد ہی کھیل سکیں گے۔ ٹورنامنٹ کا پہلا سیزن رواں سال جنوری میں مسقط میں 3 ٹیموں کے درمیان کھیلا گیا تھا ۔

 

یہ بھی پڑھئے: ہندوستان اور ویسٹ انڈیز کے درمیان آخری دو T20 میچ کا بدلے گا مقام! یہ ہے وجہ

پہلے سیزن میں محمد کیف نے انڈیا مہاراجہ ، ڈیرن سیمی نے ورلڈ جائنٹس اور مصباح الحق نے ایشیا لائنز کی کپتانی کی تھی ۔ فائنل سمیت کل 7 میچ کھیلے گئے تھے ۔ ٹائٹل میچ میں جائنٹس نے فائنل میں لائنز کو 25 رنز سے شکست دی تھی ۔ ہندوستانی خاتون کرکٹر جھولن گوسوامی اور بالی ووڈ کے لیجنڈ امیتابھ بچن اس لیگ کے برانڈ ایمبیسیڈر ہیں۔ سابق تجربہ کار کرکٹر روی شاستری لیگ کے کمشنر جبکہ پاکستان کے سابق لیجنڈ گیند باز وسیم اکرم ایپکس کونسل کے واحد رکن ہیں ۔

پاکستان اور ہندوستان کے درمیان تنازع کی وجہ سے طویل عرصے سے دوطرفہ سیریز نہیں کھیلی جا رہی ہے۔ اگلے سال ہندوستان میں ون ڈے ورلڈ کپ ہونے والا ہے، ایسے میں پاکستان کے کھلاڑیوں کو حکومت سے لیجنڈز کرکٹ لیگ میں اترنے کی اجازت مل سکتی ہے ۔