سرفراز احمد کو عمران خان نے بتائی ٹیم میں واپسی کی تدبیر ، پاکستانی وزیر اعظم نے یہ کام کرنے کیلئے کہا

انگلینڈ میں منعقد ہوئے آئی سی سی ورلڈ کپ 2019 میں پاکستانی کرکٹ ٹیم کی شرمناک کارکردگی کے بعد سے سرفراز احمد تنقید کے نشانے پر ہیں ۔ انہیں پاکستان کی ٹیسٹ اور ٹی 20 ٹیم کی کپتانی سے ہٹادیا گیا ہے ۔ یہاں تک کہ آسٹریلیا کے دورہ کیلئے بھی انہیں ٹیم میں شامل کرنے کے قابل بھی نہیں سمجھا گیا ۔ حالانکہ اب پاکستان کے سابق کپتان اور موجودہ وزیر اعظم عمران خان نے سرفراز احمد کو ٹیم میں واپسی کا طریقہ بتایا ہے ۔ یہ اور بات ہے کہ ورلڈ کپ کے دوران بھی انہوں نے سرفراز احمد کو ہندوستان کے خلاف اہم مقابلہ سے پہلے مشورہ دیا تھا ، جس کو پاکستانی کپتان نے نظر انداز کردیا تھا ۔

سرفراز احمد حالیہ وقت میں نہ صرف کپتان بلکہ بلے باز کے طور پر بھی ناکام ثابت ہوئے ہیں ۔ سری لنکا کی دوسرے درجہ کی ٹیم نے بھی پاکستان کی زمین پر میزبان ٹیم کو تین صفر سے ٹی 20 سیریز میں دھول چٹادی ، جس کے بعد سرفراز کو کپتانی سے ہٹادیا گیا اور اظہر علی کو پاکستان کی ٹیسٹ ٹیم اور بابر اعظم کو ٹی 20 ٹیم کی کمان سونپ دی گئی ۔ حالانکہ ابھی یہ واضح نہیں ہے کہ سرفراز احمد پاکستان کی ون ڈے ٹیم کے کتپان برقرار رہیں گے یا نہیں ۔ اس اس لئے کیونکہ پاکستان کو اپنا اگلا ون ڈے ٹورنامنٹ جولائی 2020 میں کھیلنا ہے ۔ سرفراز احمد کی قیادت میں پاکستان کی ٹیم آئی سی سی ورلڈ کپ میں پانچویں نمبر پر رہی تھی ۔



اب اس برے وقت میں سرفراز احمد کو پاکستان کے سابق کپتان اور دنیا کے بہترین آل راونڈر میں شمار عمران خان کی حمایت ملی ہے ۔ عمران خان نے کہا کہ مجھے نہیں لگتا ہے کہ کسی کھلاڑی کی کارکردگی کو جانچنے کا پیمانہ ون ڈے اور ٹیسٹ کی جگہ ٹی 20 کرکٹ ہونا چاہئے ۔ سرفراز احمد قومی ٹیم میں واپس آسکتے ہیں ، لیکن انہیں اس کیلئے گھریلو کرکٹ پر اپنی توجہ مرکوز کرنی ہوگی ۔ عمران خان نے اس کے ساتھ ہی پاکستان کرکٹ ٹیم کے ہیڈ کوچ اور چیف سلیکٹر مصباح الحق کی بھی تعریف کی ۔ انہوں نے ان عہدوں کیلئے مصباح الحق کو منتخب کئے جانے کے فیصلہ کو صحیح قرار دیا ۔

پاکستانی وزیر اعظم عمران خان نے کہا کہ مصباح الحق کو چیف سلیکٹر اور ہیڈ کوچ مقرر کرنے کا فیصلہ صحیح ہے ، کیونکہ وہ ایک ایماندار اور بھید بھاو نہیں کرنے والا شخص ہے ، ان کے پاس کافی تجربہ ہے ، مجھے لگتا ہے کہ ان کی دیکھ ریکھ میں پاکستان کی ٹیم ٹیسٹ اور ون ڈے کرکٹ میں کافی بہتر کارکردگی کا مظاہرہ کرے گی ۔ عمران خان نے کہا کہ مصباح کے اندر ایسی صلاحیت ہے کہ وہ کھلاڑیوں کو بہتر کارکردگی کا مظاہرہ کرنے کی سمت میں ان کی مدد کرسکتے ہیں ۔ بتادیں کہ آسٹریلیا دورہ پر گئی پاکستانی کرکٹ ٹیم کو ٹی 20 سیریز میں شکست کا سامنا کرنا پڑا تھا ۔ اب دونوں ٹیمیں دو میچوں کی ٹیسٹ سیریز میں ایک دوسرے کا سامنا کریں گی ۔ پہلا میچ 21 نومبر سے برسبین میں شروع ہوگا ۔