ایک دن میں دو لیجنڈ کا ریٹائرمنٹ کا اعلان، فنچ کے بعد پاکستانی بلے باز نے کرکٹ کو کہا الوداع

نئی دہلی : کرکٹ فینس کو منگل کو ایک ہی دن میں دو بڑے جھٹکے لگے۔ پہلے ایرون فنچ نے انٹرنیشنل کرکٹ سے ریٹائرمنٹ کا اعلان کیا۔ اب پاکستانی ٹیم کے وکٹ کیپر بلے باز کامران اکمل نے بھی ریٹائرمنٹ کا اعلان کر دیا ہے۔ انہوں نے منگل کو باضابطہ طور پر اس کا اعلان کیا۔ وہ کافی عرصے سے پاکستان کی قومی ٹیم سے باہر ہیں۔ ایسے میں انہوں نے مسابقتی کرکٹ سے ریٹائرمنٹ کا اعلان کر دیا۔ آج کا دن کرکٹ کی دنیا میں ہمیشہ یاد رکھا جائے گا۔ صبح آسٹریلیا کی ٹیم کے کپتان ایرون فنچ نے سبھی فارمیٹس سے ریٹائرمنٹ کا اعلان کیا تو وہیں شام ہوتے ہوتے پاکستان سے بھی ریٹائرمنٹ کی خبر سامنے آئی ۔

کامران اکمل کو پاکستان کرکٹ بورڈ نے ایک روز قبل ہی سلیکشن کمیٹی میں جگہ دی تھی۔ پاکستان کرکٹ لیگ شروع ہونے میں صرف چند دن باقی ہیں۔ انہوں نے فرنچائزی پشاور زلمی میں بطور مینٹور شمولیت اختیار کی ہے۔

پاکستانی میڈیا سے گفتگو کے دوران کامران اکمل نے ریٹائرمنٹ کا اعلان کیا۔ اکمل نے کہا کہ وہ اس وقت کسی بھی فارمیٹ میں نہیں کھیلیں گے۔ انہوں نے کہا کہ جب میں ڈومیسٹک کرکٹ نہیں کھیل رہا ہوں تو مجھے لیگ کرکٹ بھی نہیں کھیلنی چاہئے۔ اگر میں کھیلتا ہوں تو اس سے کسی مستحق کھلاڑی کی جگہ خراب ہوتی ہے۔

اسی دوران ایک صحافی نے سوال کیا کہ کیا وہ اب ریٹائرمنٹ لے رہے ہیں، جس پر کامران نے کہا: ہاں بالکل، اب میں سلیکٹر بھی بن گیا ہوں اور مینٹور بھی بن گیا ہوں ۔

یہ بھی پڑھئے: جان نکالتاہےوہ گیندباز کی، کوہلی۔دھونی نہیں اس ہندوستانی بلےبازسےڈرتا تھا یہ پاکستانی پیسر

یہ بھی پڑھئے: کرکٹ شائقین کیلئے بری خبر، ورلڈ کپ میں پاکستان۔ہندوستان کے بیچ نہیں ہوگی ٹکر: جانئے کیوں

بتادیں کہ کامران اکمل نے پاکستان کرکٹ ٹیم کیلئے اپنا آخری میچ سال 2017 میں ون ڈے فارمیٹ میں ویسٹ انڈیز کے خلاف کھیلا تھا۔ وہ گزشتہ چھ سال سے پاکستانی ٹیم سے باہر تھے۔ حالانکہ اکمل پاکستان سپر لیگ میں خدمات انجام دے رہے تھے۔ کامران اکمل نے پاکستان کی جانب سے 53 ٹیسٹ، 157 ون ڈے اور 58 ٹی ٹوینٹی میچز کھیلے ہیں۔ ایک ٹاپ کلاس وکٹ کیپر کے طور پر بھی فینس انہیں یاد رکھیں گے ۔