Cricket: بابر اعظم اور فخر زماں کی جگہ لے سکتا ہے یہ کھلاڑی، مصباح الحق کا دعوی

نئی دہلی : پاکستان کے سابق کپتان مصباح الحق نے ٹاپ آرڈر بلے باز شان مسعود کو قومی ٹیم میں کپتان بابر اعظم، امام الحق اور فخر زمان کیلئے ایک آئیڈیل متبادل کے طور پر منتخب کیا ہے۔ سابق پاکستانی بلے باز نے کہا کہ ٹیم انتظامیہ آنکھیں بند کر کے اس بائیں ہاتھ کے بلے باز کو ٹیم میں شامل کر سکتی ہے ۔

شان مسعود نے ڈربی شائر کے ساتھ کاؤنٹی کے دوران شاندار کارکردگی کا مظاہرہ کیا تھا ۔ بائیں ہاتھ کے بلے باز نے کاؤنٹی چیمپئن شپ کے آٹھ میچوں میں 82.61 کی اوسط سے 1074 رنز بنائے تھے ۔ مسعود نے تین سنچریاں اور چار نصف سنچریاں بھی اسکور کیں۔ مسعود نے ٹی ٹوینٹی بلاسٹ 2022 کے دوران بھی اچھی کارکردگی کا مظاہرہ کیا تھا ۔ انہوں نے 45.58 کی شاندار اوسط سے 547 رنز بنائے اور تقریباً 140 کے اسٹرائیک ریٹ سے بلے بازی ۔ انہوں نے 20 اوور کے ٹورنامنٹ کے دوران پانچ نصف سنچریاں بھی بنائیں ۔

 

یہ بھی پڑھئے: پاکستان ٹیم میں ان پانچ کھلاڑیوں کو ملی جگہ، ہندوستان کو دے چکے ہیں زور کا جھٹکا

شان مسعود کی پرفارمنس کو دیکھنے کے بعد مصباح الحق نے جیس کرکٹ سے کہا کہ اگر بابر اعظم، امام الحق اور فخر زمان ان تینوں میں سے کوئی نہیں کھیل رہا ہو تو آپ آنکھیں بند کر کے مسعود کو ٹیم میں لے سکتے ہیں۔ یہ پاکستان کیلئے ایک مثبت چیز ہو سکتی ہے ۔

 

یہ بھی پڑھئے: کرکٹر بھائی اور بھابھی نے ٹیم کو بنایا ورلڈ چیمپن، چھوٹے بھائی نے CWG 2022 میں مچایا دھمال

بتادیں کہ شان مسعود کو سری لنکا کے خلاف دو میچوں کی ٹیسٹ سیریز کے لئے پاکستانی ٹیم میں منتخب کیا گیا تھا ۔ تاہم بائیں ہاتھ کے بلے باز کو دونوں میچوں میں پلیئنگ الیون میں شامل نہیں کیا گیا تھا۔ انہوں نے اپنا آخری ٹیسٹ میچ جنوری 2021 میں کھیلا تھا۔ مسعود کو نیدرلینڈز کے خلاف آئندہ وائٹ بال میچز اور اہم ترین ٹی ٹوینٹی ایشیا کپ میں بھی نظر انداز کر دیا گیا ہے ۔

دریں اثنا 'مین ان گرین' 16 اگست سے شروع ہونے والی تین میچوں کی ون ڈے سیریز میں نیدرلینڈز کا مقابلہ کرے گی۔ اس کے بعد پاکستان کرکٹ ٹیم ایشیا کپ کے لیے یو اے ای جائے گی ۔