پاکستان کو چھوٹے ہدف کیلئے بھی بہانا پڑا پسینہ، نیدرلینڈس کو ہرا کر درج کی پہلی جیت

نئی دہلی : پاکستان کرکٹ ٹیم کو آخر کار آئی سی سی ٹی ٹوینٹی ورلڈ کپ میں پہلی کامیابی مل گئی ہے ۔ اتوار کو نیدرلینڈس کے خلاف ٹیم نے 6 وکٹوں سے جیت کے ساتھ ٹورنامنٹ میں پوائنٹس کا کھاتہ کھولا۔ پہلے بلے بازی کرتے ہوئے نیدرلینڈس کی ٹیم 9 وکٹوں پر 91 رنز ہی بنا سکی۔ چھوٹے ہدف کے تعاقب میں اتری پاکستان کی ٹیم نے 13.5 اوورز میں 4 وکٹوں کے نقصان پر جیت درج کرلی ۔

صرف 92 رنز کے ہدف کے تعاقب میں میدان میں اتری پاکستانی ٹیم کے کپتان بابر اعظم ایک بار پھر ناکام رہے۔ 5 گیندوں پر 4 رنز بنانے کے بعد کپتان بابر رن آؤٹ ہو کر پویلین واپس لوٹ گئے۔ محمد رضوان نے فخر زمان کے ساتھ مل کر پاکستانی ٹیم کو سنبھالا ۔ فخر 16 گیندوں پر 20 رنز بنانے کے بعد اپنی وکٹ گنوا بیٹھے ۔ اس کے بعد رضوان 39 گیندوں پر 49 رنز بناکر آؤٹ ہوگئے۔ افتخار احمد نے ٹیم کو جیت سے ہمکنار کرایا ۔

یہ بھی پڑھئے: وراٹ کوہلی کی فارم کودیکھ کر گھبرائے پاکستان کے سابق کپتان، ٹیم انڈیا کیلئے دیا اچھا اشارہ

یہ بھی پڑھئے: ٹیم انڈیا کیلئے سیمی فائنل کی دوڑ میں افریقہ کے ساتھ۔ساتھ یہ ٹیم ہے سب سے بڑی سردرد

پاکستان کے گیندباز نیدرلینڈس کے خلاف شاندار کارکردگی کا مظاہرہ کرتے ہوئے ٹیم کو 100 رنز سے نیچے روکنے میں کامیاب رہے۔ شاداب خان نے 4 اوورز میں 22 رنز دے کر 3 جبکہ محمد وسیم نے 2 وکٹیں حاصل کیں۔ شاہین آفریدی، نسیم شاہ اور حارث رؤف کو 1-1 کامیابی ملی۔ نیدرلینڈس کی جانب سے کالنگ آکمین نے سب سے زیادہ 27 رنز بنائے جبکہ کپتان اسکاٹ ایڈورڈ نے 15 رنز بنائے۔

پاکستان کی ٹیم کو پہلے میچ میں ہندوستان کے ہاتھوں شکست ہوئی تھی۔ اس کے بعد زمبابوے کی ٹیم نے بھی قریبی میچ میں شکست دے کر اپ سیٹ کر دیا تھا ۔ نیدرلینڈس کے خلاف ٹیم کی جیت نے اسے پہلا پوائنٹ دیا۔ سیمی فائنل میں پہنچنے کے لئے ٹیم کو ہندوستان کی جیت کیلئے دعا کرنی ہوگی جبکہ اس کو آگے سبھی میچز جیتنے ہوں گے۔