وراٹ کوہلی بنے ٹی ٹوینٹی ورلڈ کپ کے نئے 'کنگ'، مہیلا جے وردھنے کا ریکارڈ چھوٹا پیچھے

نئی دہلی: وراٹ کوہلی نے ٹی ٹوینٹی ورلڈ کپ 2022 میں تاریخ رقم کردی ہے۔ ہندوستانی اسٹار بلے باز کوہلی بدھ کو بنگلہ دیش کے خلاف ناٹ آوٹ 64 رنز کی اننگز کھیل کر ٹی ٹوینٹی ورلڈ کپ کی تاریخ میں سب سے زیادہ رنز بنانے والے کھلاڑی بن گئے ہیں ۔ اس کے ساتھ ہی انہوں نے اس ریکارڈ میں مہیلا جے وردھنے کو پیچھے چھوڑ دیا ہے۔ اتوار کو جنوبی افریقہ کے خلاف 12 رنز بنا کر کوہلی ٹورنامنٹ میں 1000 رنز کے کلب میں داخل ہوگئے تھے ۔ تاہم ہندوستان کو جنوبی افریقہ کے خلاف شکست کا منہ دیکھنا پڑا تھا ۔

ہندوستانی اسٹار کو سری لنکائی لیجنڈ مہیلا جے وردھنے کو پیچھے چھوڑنے کے لیے صرف 16 رنز درکار تھے۔ ایڈیلیڈ میں بنگلہ دیش کے خلاف ٹیم انڈیا پہلے بلے بازی کرنے کیلئے اتری۔ روہت شرما کے جلد پویلین لوٹنے کے بعد وراٹ کوہلی کریز پر آئے۔ انہوں نے جلد ہی 16 رنز بنا کر جے وردھنے کو پیچھے چھوڑ دیا۔ وراٹ کوہلی نے بنگلہ دیش کے خلاف 145.45 کے اسٹرائیک ریٹ سے 44 گیندوں میں 64 رنز بنائے۔ کوہلی کی اننگز میں 8 چوکے اور ایک چھکا شامل رہا ۔

سری لنکائی لیجنڈ جے وردھنے نے ٹی ٹوینٹی ورلڈ کپ میں 1016 رنز بنائے تھے۔ جے وردھنے نے ٹی ٹوینٹی ورلڈ کپ میں کل 31 میچ کھیلے ہیں ۔ اس دوران ان کا اوسط 39.07 کا اور اسٹرائیک ریٹ 134.74 رہا۔ ان کا بیسٹ اسکور 100 رنز تھا۔ کوہلی نے اس مقام تک پہنچنے کیلئے صرف 25 میچ کھیلے۔ ان کا 83.41 کا اوسط اور 131.71 کا اسٹرائیک ریٹ ہے۔ ان کا بیسٹ اسکور 89 رنز ناٹ آؤٹ ہے۔

یہ بھی پڑھئے: ہندوستان سیمی فائنل کے قریب، پاکستان کے تابوت میں ٹھوکی آخری کیل، ورلڈ کپ سے باہر!

یہ بھی پڑھئے: سوریہ کمار یادو نے محمد رضوان کو چھوڑا پیچھے، بنے ٹی ٹوینٹی رینکنگ میں نمبر ون بلے باز

سب سے زیادہ رنز بنانے والوں کی فہرست میں سے کوئی بھی 1000 رنز کا ہندسہ عبور نہیں کر سکا ہے۔ کرس گیل 965 رنز کے ساتھ تیسرے اور ہندوستانی کپتان روہت شرما 919 رنز کے ساتھ تیسرے نمبر پر ہیں ۔

ٹی ٹوینٹی ورلڈ کپ میں سب سے زیادہ رنز

1065 - وراٹ کوہلی (23 اننگز)*
1016 - ایم جے وردھنے (31 اننگز)
965 – کرس گیل (31 اننگز)
921 - روہت شرما (34 اننگز) *