CWG 2022: سوربھ گھوشال نے رقم کی تاریخ، اسکواش میں دفاعی چیمپئن کو ہراکر جیتا برانز میڈل

نئی دہلی : کامن ویلتھ گیمز کے چھٹے دن ہندوستان کو اسکواش میں ایک برانز میڈل ملا ۔ مردوں کے سنگلز کے برانز میڈل مقابلے میں سوربھ گھوشال نے انگلینڈ کے جیمز ولسٹراپ کو سیدھے سیٹوں میں شکست دے کر برانز میڈل جیتا۔ اس میچ میں سوربھ شروع سے ہی میزبان انگلینڈ کے کھلاڑی پر حاوی رہے اور انہوں نے اسے تیسرے گیم تک اس کو برقرار رکھا۔ سوربھ ، جیمز کے والد میلکم سے کوچنگ لے چکے ہیں ۔ اس میچ سے پہلے تک جیمز کا سوربھ کے خلاف ریکارڈ دمدار تھا۔ وہ ہندوستانی کھلاڑی کے خلاف 8 میچ جیتے تھے ۔ لیکن گھوشال برانز میڈل کے مقابلے میں بھاری پڑ گئے۔ جیمز نے پچھلے کامن ویلتھ گیمز میں گولڈ میڈل جیتا تھا۔

 

یہ بھی پڑھئے: ٹیبل ٹینس ٹیم نے جیتا گولڈ، کامن ویلتھ گیمز میں ہندوستان کو ملا گیارہواں میڈل

سوربھ نے اس جیت کے ساتھ تاریخ رقم کردی ہے۔ وہ کامن ویلتھ گیمز میں اسکواش کے سنگلز ایونٹ میں میڈل جیتنے والے پہلے ہندوستانی بن گئے ہیں۔ انہوں نے انگلینڈ کے سابق ورلڈ چیمپئن ولسٹراپ کو برانز میڈل کے لئے ہوئے یک طرفہ مقابلے میں 11-6، 11-1 اور 11-4 سے ہرایا ۔

 

یہ بھی پڑھئے: ہندوستان نے لان بالس میں جیتا تاریخی گولڈ، خاتون ٹیم نے رقم کی تاریخ

پہلی مرتبہ سنگلز ایونٹ میں میڈل جیتنے کی خوشی 35 سالہ سوربھ کے چہرے پر صاف دکھائی دے رہی تھی۔ ان کی آنکھوں سے خوشی کے آنسو چھلک پڑے ۔ سوربھ نے سیمی فائنل میں نیوزی لینڈ کے پال کول کو شکست دی تھی۔ اس سے پہلے سوربھ نے 2018 گولڈ کوسٹ کامن ویلتھ گیمز میں مکسڈ ڈبلز مقابلے میں سلور میڈل جیتا تھا۔ کامن ویلتھ گیمز میں یہ ان کا دوسرا میڈل ہے۔

ہندوستان نے اب تک سی ڈبلیو جی میں 15 میڈل جیتے ہیں۔ اس میں 5 گولڈ، 5 سلور اور 5 برانز میڈل شامل ہیں ۔ کئی کھلاڑی اب بھی میڈل کی دوڑ میں ہیں۔ جبکہ کئی ایونٹس کے مقابلے باقی ہیں۔