گوتم گمبھیر کی وراٹ پر تنقید، کہا- کوہلی کی کپتانی سمجھ سے بالاتر

 ممبئی: ہندوستان کے سابق سلامی بلے باز گوتم گمبھیر نے آسٹریلیا کے خلاف ون ڈے سیریز میں دو میچوں میں ملی مسلسل شکست کے بعد ٹیم انڈیا کے کپتان وراٹ کوہلی کو نشانہ بناتے ہوئے تیزگیندباز جسپریت بمراہ کا صحیح طریقہ سے استعمال نہ کرنے پر سوال اٹھایا ہے۔ جسپریت بمراہ نے اتوار کے روز آسٹریلیا کے خلاف موجودہ سیریز کے دوسرے میچ میں اپنے پہلے اسپیل میں دوسرا اور چوتھا اوور کرتے ہوئے محض 7 رن دیئے تھے۔ اس کے بعد پاورپلے میں ان سے صرف ایک اوور کروایا گیا۔ جسپریت بمراہ نے اننگزکا 9واں اوور ڈالا۔ گوتم گمبھیر نے کہا کہ ان کی سمجھ سے باہر ہے کہ بمراہ کو نئی گیندباز سے صرف دو اوور کیوں کرائے گئے۔

گوتم گمبھیر نے اتوار کے روز میچ کے بعد کرک انفو کے ایک پروگرام میں کہا کہ ’ایمانداری سے کہوں تو مجھے وراٹ کوہلی کی کپتانی سمجھ نہیں آئی۔ ہم اس بارے میں مسلسل بات کررہے ہیں کہ ہمیں زیادہ سے زیادہ وکٹ حاصل کرنا ہوگا اور ہمیں آسٹریلیا کی بلے بازی لائن اپ کا توڑ نکالنا ہوگا، لیکن وراٹ کوہلی اپنے اہم گیندباز جسپریت بمراہ سے نئی گیند سے دو اوور ہی کرا رہے ہیں۔ عام طور پر ایک روزہ میچ میں 4-3 اوور کے اسپیل ہوتے ہیں اور کسی گیندباز سے زیادہ تر ایک اسپیل میں چار اوور کرائے جاتے ہیں۔

سابق سلامی بلے باز گوتم گمبھیر نے کہا کہ اگر آپ نئی گیندباز کے ساتھ دو اوور بلے بازی کراکر اپنے اہم گیندباز کو روکتے ہیں تو میرے لئے یہ کپتانی سمجھنا مشکل ہے۔ یہ ٹی ٹوئنٹی کرکٹ نہیں ہے۔ ہندوستان کی شکست ہوئی کیونکہ خراب کپتانی تھی۔ ٹیم سلیکشن پر بھی سوال اٹھاتے ہوئے گمبھیر نے کہا کہ وہ واشنگٹن سندر یا شیوم دوبے کو ایک روزہ میچ میں شامل کرسکتے تھے۔ اس سے پتہ چلتا ہے کہ وہ ایک روزہ میچ میں کیسی کارکردگی کرتے ہیں۔ اگر یہ دونوں آسٹریلیا میں نہیں ہیں تو یہ کہیں نہ کہیں سے ٹیم سلیکشن میں کمی کو ظاہر کرتا ہے۔ جب تک ہم کسی کو موقع نہیں دیں گے تو ہمیں کیسے پتہ لگے گا کہ وہ بین الاقوامی سطح پر کتنا بہتر ہے۔” واضح رہے کہ آسٹریلیا نے لگاتار دو ون ڈے میچوں میں 370 سے زائد رنز بنائے اور دوسرا ون ڈے 51 رنز سے جیت کر تین میچوں کی سیریز اپنے نام کرلی ۔ آسٹریلیا نے پہلے میچ 374 رن بناکر 66 رنز سے میچ جیت لیا تھا۔