Ind vs Aus : سڈنی میں ہوا کرشمہ، ہندوستان نے ڈرا کروایا تیسرا ٹسٹ

نئی دہلی: رشبھ پنت (Rishabh Pant)، چتیشور پجارا اور شبھمن گل (Shubman Gill) کی نصف سنچری کے علاوہ ہنوما وہاری اور آر اشون کی جدوجہد سے پُر اننگ بلے بازی کی بدولت ہندوستان آسٹریلیا کے خلاف تیسرا ٹسٹ میچ ڈرا کروانے میں کامیاب رہا۔ اسی کے ساتھ چار میچوں کی سیریز ابھی بھی 1-1 سے برابری پر ہے۔ اب سیریز پر قبضہ کرنے کے لئے دونوں ٹیموں کی نظر برسبین میں ہونے والے چوتھے ٹسٹ میچ پر ہوگی۔ میزبان ٹیم نے ہندوستان کے سامنے جیت کے لئے 407 رنوں کا ہدف رکھا تھا، جس کے جواب میں ہندوستان نے پورے دن بلے بازی کی اور دوسری اننگ میں پانچ وکٹ پر 334 رن بنائے۔

ایک وقت ہندوستان کے ہاتھ سے مقابلہ نکلتا نظر آرہا تھا، مگر چتیشور پجارا اور رشبھ پنت نے 148 رن کی شراکت کرکے ایک امید جگائی اور پھر اس کے بعد آر اشون اور ہنوما وہاری دیواری بن گئے۔ دونوں نے سست، مگر اہم اننگ کھیلی۔ ہنوما وہاری 23 رن اور آر اشون 39 رن پر ناٹ آوٹ رہے۔ اس سے قبل آسٹریلیا نے پہلی اننگ میں 338 رن بنائے تھے۔ اس کے بعد ہندوستانی ٹیم 244 رن ہی بنا پائی۔ پہلی اننگ میں ملی سبقت کو میزبان نے دوسری اننگ 6 وکٹ کے نقصان پر 312 رن پر ڈکلیئر کرکے مزید مضبوط کردی۔

جوڑی کے ٹوٹنے پر ٹوٹ گئی تھی امید

چوتھے دن ہندوستان نے 98 رن پر روہت شرما اور شبھمن گل کے طور پر دو بڑے وکٹ گنوا دیئے تھے۔ اس کے بعد اجنکیا رہانے بھی پانچویں دن جلدی پویلین لوٹ گئے۔ حالانکہ اس کے بعد رشبھ پنت اور اجنکیا رہانے نے سنچری کی شراکت کرکے ٹیم کی امید جگائی۔ آسٹریلیا نے خطرناک نظر آرہے رشبھ پنت اور ڈٹ کر کھیل رہے چتیشور پجارا کو پویلین بھیج کر ٹی بریک تک ہندوستان کو 280 رن پر پانچ جھٹکے دے دیئے تھے۔ اس جوڑی کے ٹوٹنے سے ٹیم اور مداحوں کی امید بھی ٹوٹتی ہوئی نظر آرہی تھی، مگر پھر ہنوما وہاری اور آر اشون نے کریز پر اپنے پیر جما لئے۔

رشبھ پنت نے شاندار بلے بازی کرتے ہوئے آسٹریلیا کے گیند بازوں کو نشانہ بنایا اور اپنی 118 گیندوں کی اننگ میں 12 چوکے اور تین چھکے لگائے۔ ناتھن لائن حالانکہ دوسری نئی گیند سے رشبھ پنت کو پویلین بھیجنے میں کامیاب رہے۔ رشبھ پنت نے سنچری مکمل کرنے کی کوشش میں بڑا شاٹ کھیلنے کی کوشش کی، لیکن اسپن ہوتی گیند ان کے بلے کا باہری کنارا لے کر شارٹ تھرڈ مین پر کھڑے پیٹ کمنس کے ہاتھوں میں چلی گئی۔ رشبھ پنت کے آوٹ ہونے کے بعد چتیشور پجارا نے کچھ اچھے شاٹ کھیلے، لیکن جوش ہیزل ووڈ نے انہیں بولڈ کرکے ان کی 205 گیندوں کی اننگ کا خاتمہ کیا۔ چتیشور پجارا نے اپنی اننگ میں 12 چوکے لگائے۔