IPL 2022 : آئی پی ایل کی تاریخ میں یہ کام کرنے والے پہلے بلے باز بنے آر اشون، جانئے پوری تفصیل

نئی دہلی : آر اشون نے اتوار کو راجستھان رائلز اور لکھنؤ کے درمیان کھیلے گئے میچ میں راجستھان کی اننگز کے دوران خود کو ریٹائر آوٹ کر لیا تھا ۔ اشون نے یہ فیصلہ اننگز کے 19ویں اوور میں کیا ۔ میچ کے آخری اوورز میں ان کے بلے سے بڑے شاٹس نہیں نکل رہے تھے، وہ صرف اسٹرائیک روٹیٹ کررہے تھے، انہوں نے بیٹنگ کا آغاز اچھا کیا تھا ، لیکن بعد میں وہ گیند کو باؤنڈری کے پار پہنچانے میں ناکام رہے۔ اس کی وجہ سے اشون نے اچانک یہ فیصلہ کیا اور امپائر کو بتانے کے بعد ڈریسنگ روم چلے گئے ۔ ان کی جگہ ریان پراگ بیٹنگ کے لئے میدان میں آئے ۔

 

یہ بھی پڑھئے : آر سی بی کے اس بڑے گیند باز کو میچ کے دوران ملی یہ بری خبر، لیگ چھوڑ کر گھر لوٹا

اشون آئی پی ایل کی تاریخ میں ریٹائر آوٹ ہونے والے پہلے کھلاڑی بن گئے ہیں۔ اس کے ساتھ ہی وہ ٹی ٹوینٹی کرکٹ میں ایسا کرنے والے چوتھے کھلاڑی بن گئے ہیں ۔ اشون کے اس فیصلہ کی ہر طرف ستائش ہو رہی ہے ۔ انہوں نے یہ فیصلہ ٹیم کے مفاد میں کیا ۔

بتا دیں کہ راجستھان کے 67 رنز پر 4 وکٹیں گر چکی تھیں۔ اس کے بعد اشون نے ہیٹمائر کے ساتھ 5ویں وکٹ کے لیے 68 رنز کی اہم شراکت داری کی۔ اشون نے 23 گیندوں کا سامنا کیا اور 28 رنز بنائے ۔ ان کے بلے سے دو زبردست چھکے بھی لگے۔ انہوں نے ہیٹمائر  کے ساتھ وکٹ بچائی، تب ہی راجستھان کی ٹیم 20 اوورز میں 165 رنز بنا سکی ۔

 

یہ بھی پڑھئے : جن کھلاڑیوں سے فرنچائزی نے توڑا سالوں پرانا ناطہ، وہ مچا رہے ہیں نئی ٹیموں کے ساتھ دھمال

شمرون ہیٹمائر نے راجستھان رائلز کے لئے طوفانی اننگز کھیلی ۔ ان کا کیچ پہلے کرونال پانڈیا نے چھوڑا دیا تھا ۔ اس کے بعد ویسٹ انڈیز کے بلے باز نے گیئر اس طرح تبدیل کیا کہ لکھنؤ کے گیند بازوں کے پاس ان کا کوئی جواب نہیں تھا۔ ہیٹمائر نے 36 گیندوں پر 59 رنز کی اننگز کھیلی جس میں ایک چوکا اور 6 چھکے شامل تھے۔

ادھر لکھنؤ کو آخری دو اووروں میں جیت کے لیے 34 رنز درکار تھے۔ لکھنو کے مارکس اسٹوئنس اور آویش خان کریز پر تھے۔ 19 ویں اوور میں راجستھان کے پرسدھ کرشنا بولنگ کرنے آئے اور 19 رنز دئے، آخری اوور میں لکھنؤ کو جیتنے کے لیے 15 رنز درکار تھے اور یہیں ان کیپڈ کلدیپ سین نے کمال کردیا ۔ اسٹوئنس اس اوور میں 15 رنز نہیں بنا سکے اور راجستھان نے لکھنؤ کو 3 رنز سے شکست دی ۔