انگوٹھے میں چوٹ لگنے کے سبب بہہ رہا تھا خون، پھربھی ملک کے لئے کھیل رہے تھے دھونی

انگلینڈ کے خلاف کرکٹ عالمی کپ 2019 میں انڈیا کی شکست کے بعد سابق کپتان مہندر سنگھ دھونی نقادوں کےنشانے پرآگئے تھے۔ ان کی 31 گیندوں میں 42 رنوں کی اننگ کی کئی لوگوں نے تنقید کی تھی۔ انڈیا کوانگلینڈ کی ٹیم نے31 رن سے شکست دے  دی تھی۔ 337 رنوں کے ہدف کا تعاقب کرتے ہوئے ٹیم انڈیا 5 وکٹ کے نقصان پر306 رن بنا سکی تھی۔  ہندوستان کوآخری 5 اووروں میں جیت کےلئے78 رن چاہئےتھےاورکیدارجادھو اورایم ایس دھونی کریزپرموجود تھے۔ تاہم یہ دونوں کھلاڑی 39 رن ہی بناسکے۔ اس طرح سے ہندوستان کوعالمی کپ 2019 میں پہلی بارشکست کا سامنا کرنا پڑا۔

دلچسپ بات یہ ہے کہ دھونی نے 100 سے زیادہ کی اسٹرائیک ریٹ سے رن بنائے تھے جبکہ وکٹ کافی سست ہوگیا تھا۔ وہیں پہلے 10 اوورمیں روہت شرما اوروراٹ کوہلی بھی 28 رن ہی بنا سکےتھے۔ اس کے بعد بھی سب سے زیادہ نشانے پرمہندرسنگھ دھونی ہی رہے۔ حالانکہ انگوٹھے میں چوٹ لگنے کے باوجود وہ بلے بازی کرتے رہے۔

اب خبرسامنے آئی ہے کہ میچ کے دوران دھونی کا انگوٹھا زخمی تھا۔ اس سے خون نکل رہا تھا۔ ان کےانگوٹھا چوس کرتھوکنے کی تصویربھی بہت وائرل ہورہی ہے۔ اس سے پتہ چلتا ہے کہ دھونی کےانگوٹھے میں بڑی چوٹ تھی، لیکن اس کے بعد بھی وہ میدان میں ڈٹے رہے اورٹیم کو جیت دلانے کی کوشش کرتے رہے۔  واضح رہے کہ میچ کے بعد ٹیم انڈیا کے کپتان وراٹ کوہلی نے مہندرسنگھ دھونی کا بچاو کیا تھا۔ انہوں نےکہا تھا کہ دھونی نے باونڈری لگانے کی کوشش کی تھی، لیکن سلووکٹ کے سبب ایسا نہیں ہوپایا۔ وہیں ہندوستان کے بلے بازی کوچ سنجے بانگڑنے بھی دھونی کا بچاو کیا تھا۔

انہوں نے کہا تھا کہ اسٹرائیک ریٹ کولےکراس تجربہ کاربلے بازکی مسلسل ہورہی تنقید سے وہ حیران ہیں۔ انہوں نے 7 میچوں میں سے پانچ میچوں میں ٹیم کےلئے اپنا رول بخوبی نبھایا ہے۔ انہوں نےجنوبی افریقہ کے خلاف روہت شرما کے ساتھ 70 رنوں کی شراکت کی۔ اس کے بعد آسٹریلیا کے خلاف بھی انہوں نے جوضروری تھا، وہ کیا۔ مینچسٹرمیں مشکل پچ پر انہوں نے58 رنوں کی اہم اننگ کھیلی۔ یہاں (انگلینڈ کے خلاف) بھی انہوں نےاپنے رول کو اچھے سے نبھایا ہے۔