دہلی فسادات 2020: انکیت شرما کےقتل کیس میں طاہرحسین سمیت 11لوگوں کے خلاف فرد جرم عائد، عدالت نےکیایہ اہم ریمارک

دہلی کی ککڑڈوما عدالت نے سال 2020 میں شمال مشرقی دہلی کے علاقے میں تشدد سے متعلق معاملے میں ملزمین کے خلاف فرد جرم عائد کیے ہیں۔ عدالت نے سابق ایم سی ڈی کونسلر طاہر حسین اور دس دیگر کے خلاف سازش، فساد، قتل اور مختلف گروہوں کے درمیان دشمنی کو فروغ دینے کی دفعات کے تحت الزامات طے کئے۔دہلی کی عدالت نے یہ فیصلہ انٹیلی جنس بیورو (آئی بی) کے افسر انکت شرما کے قتل کے معاملے میں سنایا ہے۔ ساتھ ہی عدالت نے اس قتل میں طاہر حسین کے کردار کو بھی اہم قرار دیا ہے۔ ککڑڈوما کورٹ نے کہا کہ گواہوں کے بیانات سے صاف ظاہر ہوتا ہے کہ تمام ملزمین موقع پر موجود تھے۔ عدالت نے کہا کہ طاہر ہجوم کو بھڑکا رہا تھا اور یہ سب واقعہ کے دوران وہاں موجود لوگوں کو نشانہ بنانے کے لیے کیا گیا۔

ان سیکشنز کے تحت الزامات طے

ککڑڈوما کورٹ نے آئی پی سی کی دفعہ 147، 148، 153 اے، 302 اور 120 بی کے تحت کیس کے الزامات طے کیے۔ عدالت نے کہا کہ ہجوم لوگوں اور ان کی املاک پر حملہ کرنے کے لیے پوری طرح تیار تھا۔ طاہر حسین نے لوگوں کو مارنے اور ہجوم کو لوگوں کو نہ بخشنے پر اکسانے کا بھی کردار ادا کیا۔ عدالت نے کہا کہ جب انکت بھیڑ کے سامنے آیا تو طاہر حسین نے بھیڑ کو اکسایا۔

عدالت نے یہ بھی کہا کہ طاہرحسین مسلسل نگرانی کر رہے تھے اور ہجوم کو ہدایات دے رہے تھے اور یہ سب کچھ ایک خاص برادری کے لوگوں کو نشانہ بنانے کے لیے کیا گیا تھا۔ عدالت نے کہا کہ ہجوم میں موجود تمام افراد نے ایک خاص کمیونٹی کے لوگوں کو نشانہ بنانے کے مقصد سے اس سازش میں ملوث تھے۔ ہجوم لوگوں کو مارنے اور نقصان پہنچانے کے واضح ارادے سے کام کر رہا تھے۔ عدالت نے کہا کہ ملزم کے خلاف دستیاب شواہد سے ثابت ہوتا ہے کہ وہ فسادات اور لوگوں کی املاک کو تباہ کرنے اور انہیں نقصان پہنچانے کی مجرمانہ سازش میں ملوث تھے۔