روزگارکی تلاش :جاب حاصل کرنے کے لیے کیسے بنائیں ریزیومے یا سی وی؟ ۔دیکھیں تصویریں

ملازمت یعنی جاب انٹرویوز کے لیے بلائے جانے سےپہلے آپ کا ریزیومے (Resume) یا سی وی ہی آپ کی شخصیت اور قابلیت کا عکاس ہوتا ہے یہ کہنا غلط نہیں ہوگا کہ ریزیومے کا آپ چہر ہ ہوتاہے۔

کوئی بھی کمپنی یا ادارہ کسی بھی جاب انٹرویو کے لیے امیدواروں کو ریزیومے یا سی وی دیکھ کر منتخب کرتاہے اگر آپ کو ریزیومے یا سی وی ٹھیک نہیں ہے تو آ پ کو انٹرویو کے لیے کا ل بھی آ نا مشکل ہے۔

جب آپ کا ریز یومے کسی بھی کمپنی یا ادارے کے شعبہ ہیو من ریسورس یعنی ایچ آر کے پاس پہنچتاہے تو صرف 10سے 30 سیکنڈز میں وہ یہ فیصلہ کرلیتے ہیں کہ آپ کا ریز یومے ادارے کی خالی اسامیوں کے لیے درکار صلاحیتوں کو پورا کررہاہے یہ نہیں ؟

آپ کیسے بنا سکتے ہیں متاثر کن ریزیومے؟۔ہم ، آج ان تصویروں کے ذریعہ آپ کو اپنی ریزیومے متاثرکن بنانے کے لیےاہم تجاویز دیں گے۔ تاکہ آپ ریزیومے کی جانچ پڑتال کے اِن 30 سیکنڈز میں اپنا گہرا اثر چھوڑ سکیں ۔

ایک مثال کے ذریعہ ہم یہ بات کہنے کی کوشش کرینگے۔ آپ ہرروز ٹی وی پر کئی اشتہارات دیکھتے ہیں ۔ آ پ صرف 30سیکنڈ کا اشتہار دیکھ کر کوئی بھی منصوعات خریدنے کا فیصلہ کرلیتے ہیں ۔ اسی طرح کسی بھی کمپنی یا ادارے میں کام کر نے والے ایچ آر کو بھی پْرکشش ریزیومے متاثر کرتے ہیں۔ آپ کو بھی ایک پْرکشش ریزیومے بناتے وقت اس بات کا خاص خیال رکھنا چاہیے کہ ریز یو مے کے ذریعہ آپ کیا پیغام دینا چاہتے ہیں ۔

آپ کا ریزیومے مختصر مگر پُراثر ہونا چاہیے۔پڑھنے والوں کو صرف 10 سے 20 سیکنڈز میں مطلوبہ تفصیلات مل جائیں۔ اگر آپ ایسے کرنے میں ناکام ہوتے تو یہ بھی امکان وہ آپ کے ریز یو مے کے لیے مزید وقت نہ دیں

ریزیومے کتنے صفحات کا ہونا چاہیے یہ ایک ایسا سوال ہے جس کے متعلق جانکاری ریزیومے بنانے سے پہلے ہی کرلینی چاہیے۔اگر آپ پہلی مرتبہ نوکری کی تلاش کررہے ہیں اور آپ کے لیے یہ کام کا پہلا تجربہ ہے تو ایک صفحے کا ریزیومے کافی ہے،

اگر آپ کو ملازمت کرتے ہوئے 5 سے 10 سال ہوگئے ہیں تو ڈیڑھ سے دو صفحے، اور اگر پندرہ سال سے اوپر کا تجربہ رکھتے ہیں تب ہی تین صفحات تک پہنچیں، مگر یاد رکھیں کسی صورت میں بھی ریزیومے تین صفحات سے زیادہ نہ ہوں۔

جب آپ ملازمت کے حصول کے لیے اداروں میں اپنا ریزیومے بھیجتے ہیں تو کسی کو بھی آپ کی ولدیت، شناختی کارڈ نمبر، آپ کی ازدواجی حیثیت اور آپ کے پاسپورٹ نمبر کی ضرورت نہیں ہوتی، لہٰذا ایسی معلومات کو حذف کریں اور اپنے ریزیومے کو مختصر کریں۔ یہ معلومات بعد میں ضرورت پڑنے پر آپ سے مانگی جاسکتی ہیں۔

ریزیومے میں اپنی جاب کی ذمہ داریاں (یعنی جاب ڈسکرپشن) کو مختصر اور پڑھنے میں دلچسپ بنانے کے لیے آپ اِنہیں نکات کی صورت میں لکھیں اور اِن نکات کو بھی صرف 5 سے 7 پوائنٹس تک محدود رکھیں۔ تا کہ پڑھنے والے کو آسانی ہو۔

آپ کے تجربے سے متعلق حصہ نہ صرف مختصر ہو بلکہ پڑھنے میں بھی دلچسپ ہو۔ اگر آپ ایک پرانے اور تجربہ کار ملازم ہیں تو زیادہ توجہ اپنی موجودہ ملازمت پر دیں اور پرانے تجربات کی تفصیلات کو جتنا مختصر ہوسکتا ہے اتنا مختصر بیان کریں

اپنی تعلیمی تفصیلات کو آخری دو ڈگریوں تک محدود کریں، اگر آپ نے ماسٹر کیا ہوا ہے تو صرف ماسٹر اور گریجوئیشن کی تفصیل لکھیں، جب آپ ماسٹر کرچکے ہیں اور برسوں سے نوکری کر رہے ہیں تو پھر کمپنیوں کو اِس بات میں دلچسپی نہیں رہتی کہ آپ نے میٹرک کہاں سے کیا ہے؟ لہٰذا یہ اضافی معلومات ہیں اِنہیں حذف کردیں۔

اپنے ریزیومے میں ایک تصویر کا اضافہ ضرور کریں، مگر خیال رکھیں کہ یہ پروفیشنل پورٹریٹ ہو، گوگل کرنے پر آپ کو پروفیشنل پورٹریٹ کی کئی مثالیں مل جائیں گی، جس سے رہنمائی حاصل کرنے کے بعد آپ ایک عدد پروفیشنل پروفائل پکچر بنوا کر اپنے ریزیومے میں لگاسکتے ہیں۔

کی-ورڈ وہ لفظ ہوتا ہے جو آپ کی مکمل جاب پروفائل کو ایک لفظ میں بیان کردیتا ہے۔ مثلاً اگر آپ کا تجربہ سیلز کے حوالے سے ہے تو آپ کے لیے مناسب کی-ورڈ ہوں گے سیلز، مارکیٹنگ، کسٹمر ہینڈلنگ، کمپلین مینیجمنٹ، وغیرہ۔ جب ایچ آر ڈپارٹمنٹ کا ذمہ دار آپ کے ریزیومے کا مطالعہ کرے گا تو ایک طائرانہ نگاہ میں وہ اُنہی الفاظ یعنی کہ کی-ورڈز کو ڈھونڈنے کی کوشش کرے گا۔ اگر وہ اُس کو نظر آگئے تو آپ کا ریزیومے پاس ہوجائے گا -لیکن اگر مناسب طور پر استعمال نہ کرنے کی وجہ سے یہ کی-ورڈز اُس کی نظروں سے اوجھل ہوگئے تو بہت ممکن ہے کہ آپ کا ریزیومے مسترد ہوجائے لہٰذا اپنی ملازمت کے حوالے سے کی-ورڈز تلاش کرنے کی کوشش کریں اور اُن کو ریزیومے میں زیادہ سے زیادہ استعمال کریں۔

اِسی طرح اگر کمپنی کا ایچ آر کوئی سافٹ ویئر یا کسی ویب سائٹ کا استعمال کررہا ہے، جیسے لنکڈ-ان، تو پھر یقیناً اِن کی-ورڈز کا مؤثر استعمال آپ کو اُس کے سامنے لاسکتا ہے، لیکن اِن کی-ورڈز کا کم استعمال آپ کو پسِ منظر میں بھی ڈھکیل سکتا ہے۔

آپ کا کیریئرآبجیکٹیو، جو کہ ریزیومے کا سب سے ابتدائی حصہ ہوتا ہے، اگر وہ پڑھنے والے کو متاثر کردے تو اِس بات کے امکانات بڑھ جاتے ہیں کہ باقی کا ڈاکیومنٹ بھی اُس کا دل جیت لے گا۔

دو یا تین لائن کا اسٹیٹمنٹ تیار کرنے میں آپ کو وقت لگانا پڑے گا، آپ کو اِس بات پر غور کرنا ہوگا کہ آپ کے اِس فیلڈ میں آنے اور اِس کمپنی میں اپلائی کرنے کا کیا مقصد ہے، اور پھر اُسی مقصد کو ذہن میں رکھتے ہوئے اپنا چند لائنوں پر مشتمل اسٹیٹمنٹ لکھیں جو مختصر، پُراثر اور حقیقت پر مبنی ہو۔ یاد رکھیں کہ یہ اسٹیٹمنٹ مختلف کمپنیز کے لیے مختلف ہوسکتا ہے۔

آخری اور سب سے اہم بات یہ کہ آپ کا ریزیومے ایک زندہ ڈاکیومنٹ ہے، یہ کوئی ایسی دستاویز نہیں جو ایک بار بنا دی تو ساری زندگی کے لیے کافی ہوگئی، بلکہ ہر کچھ دن بعد اِس کو ضرور دیکھیں کہ کس طرح اِس کو بہتر بنایا جاسکتا ہے؟ کس طرح اِس میں زبان و بیان کی تبدیلی لائی جاسکتی ہے؟ کس طرح اِس میں نئے کورسز شامل کیے جاسکتے ہیں؟ اور کس طرح اِسے مزید جامع بنایا جاسکتا ہے؟

یہ بات بھی یاد رکھیں کہ ریزیومے ہر ملازمت کی اسامی کے لیے ایک سا نہیں ہوتا۔ آپ جس اسامی کے لیے اپلائی کررہے ہیں اُس حساب سے اپنے ریزیومے میں ترمیم کریں، جو باتیں اسامی سے مطابقت نہیں رکھتیں اُنہیں خارج کریں یا اُن کو پس منظر میں لے جائیں، جبکہ جو باتیں اسامی سے متعلق ہیں اُن کو نمایاں کریں۔

آج کل نئے اور ڈیجیٹل ریزیومے زیادہ استعمال کیے جارہے ہیں ۔ آپ ریزیومے بنانے سے پہلے گوگل کی مدد سےریزیومے کےفارمیٹ دیکھ لیں ۔ تاکہ آپ موجودہ دور کے تقاضوں کے مطابق اپنا ریزیومے تیا ر کرسکیں۔اُمید ہے آپ جب مذکورہ ہدایات پر عمل کریں گے تو اپنے ریزیومے کے جواب میں ملنے والے ردِعمل میں ایک واضح فرق محسوس کریں گے۔