جب انڈرورلڈ سے اکیلے لڑ پڑی تھی پریتی زنٹا، سلمان- شاہ رخ نے بھی کورٹ جانے سے کر دیا تھا انکار

بالی ووڈ کی ڈمپل گرل یعنی پریتی زنٹا 45 سال کی ہو گئی ہیں۔ 31 جنوری 1975 کو ہماچل پردیش کے شملہ میں پریتی زنٹا کی پیدائش ہوئی۔

پریتی زنٹا کو لوگ بنداس، خوبصورت، چلبلی بہت کچھ کہتے ہیں۔ لیکن بہت کم لوگ ان کی ہمت اور بہادری کی یہ کہانی جانتے ہیں۔ یہ بات ہے اس وقت کی ہے، جب بالی ووڈ میں انڈرورلڈ کا دبدبا ہوا کرتا تھا۔ انڈرورلڈ کے لئے اپنے کالے دھن کو سفید کرنے کا یہ سب سے محفوظ ذریعہ تھا۔

پریتی زنٹا کو فلمی دنیا میں قدم رکھے مشکل سے چار سال ہی ہوئے تھے۔ 2001 میں ایک فلم رلیز ہونے والی تھی، چوری-چوری ،چپکے-چپکے۔ لیکن عباس مستان کی اس فلم پر رلیز سے پہلے ہی روک لگ گئی۔

پولیس کو خبر ملی کہ اس فلم میں انڈرورلڈ ڈان چھوٹا شکیل کا پیسا لگا ہے۔ پیچھے سے پیسا انڈرورلڈ کا تھا، لیکن کاغذ پر فلم کو فائنینس کر رہا تھا ممبئی کا مشہور ہیرا کاروباری بھرت شاہ۔ پولیس نے بھرت شاہ کو گرفتار کر لیا اور فلم کے سارے پرنٹ سیل کر دئے۔ یہ مقدمہ اس وقت کافی خبروں میں رہا۔

گرفتاری کے بعد اب پولیس کو ضرورت تھی گواہوں کی۔ شاہ رخ اس کے پہلے پولیس میں شکایت کر چکے تھے کہ انہیں انڈرورلڈ سے فون پر دھمکیاں مل رہی ہیں۔ لیکن جب پولیس نے شاہ رخ خان سے عدالت میں گواہی دینے کے لئے کہا تو انہوں نے صاف انکار کر دیا۔

فلم چوری چوری چپکے چپکے میں سلمان خان، رانی مکھرجی جیسے بڑے اسٹارس تھے، لیکن کوئی بھی عدالت میں گواہی دینے کے لئے آگے نہیں آیا۔

آگے آئی تو 26 سال کی خوبصورت، شوخ، چلبلی اور ہمتی لڑکی، جس کا نام پریتی زنٹا تھا۔ اس گواہی نے ایک طرح سے بالی ووڈ کو بھی حیرت میں ڈال دیا تھا۔ سب اس کی ہمت سے حیرت زدہ تھے۔