شاہ رخ خان کی فلم پٹھان کا بیرون ممالک بھی بجا ڈنکا، صرف پانچ دنوں میں کرلی اتنی موٹی کمائی

سپر اسٹار شاہ رخ خان نے اپنی فلم 'پٹھان' سے باکس آفس پر جو کیا ہے، بالی ووڈ پچھلے کچھ سالوں سے اس کا انتظار کر رہا تھا ۔ فلم نے پہلے ہی دن 55 کروڑ سے زائد کی کمائی کرکے سب کو حیران کردیا۔ ریلیز کے پانچویں دن اس فلم نے 500 کروڑ کا ہندسہ عبور کر لیا ہے۔

اس فلم کی کمائی نے ٹھنڈے پڑے بالی ووڈ میں جیسے جان پھونک دی ہے ۔ یہی وجہ ہے کہ اس فلم کے بنانے والے ہی نہیں بلکہ بالی ووڈ کے بہت سے لوگ پٹھان کی کمائی سے خوش ہیں۔ اس فلم نے ہندوستان اور دنیا بھر میں 542 کروڑ روپے کی گراس کمائی کی ہے۔

سامنے آئے اعداد و شمار کے مطابق اس فلم نے اب تک ہندوستان میں 335 کروڑ کی کمائی کی ہے۔ جبکہ اوورسیز میں اس فلم نے 207 کروڑ کی کمائی کی ہے۔

یعنی دنیا بھر میں فلم کی کمائی 542 کروڑ تک پہنچ گئی ہے۔ باکس آفس پر 'پٹھان' نے صرف 5 دنوں میں یہ ہندسہ چھو لیا ہے۔

اتوار کو فلم نے ملک بھر میں 58.50 کروڑ کی کمائی کی ۔ صرف 5 دن میں کمائی کے اس جادوئی اعداد و شمار کو چھونا اپنے آپ میں ایک ریکارڈ ہے۔

اب تک اس فلم نے بدھ کو 55 کروڑ، جمعرات کو 68 کروڑ، جمعہ کو 38 کروڑ اور ہفتہ کو 51.50 کروڑ کمائے ہیں۔

فلم کی کمائی کے یہ اعداد و شمار آپ کو اور بھی حیران کر سکتے ہیں، کیونکہ آنے والے ویک اینڈ پر بھی باکس آفس پر کوئی بڑی فلم شاہ رخ خان، دیپیکا پڈوکون اور جان ابراہم کی اس جوڑی کو ٹکر دینے والی نہیں ہے۔

سدھارتھ آنند کی ہدایت کاری میں بننے والی فلم 'پٹھان' میں دیپیکا پڈوکون اور جان ابراہم بھی اہم کردار میں ہیں۔ یہ فلم ہندی کے علاوہ تمل اور تیلگو میں بھی ریلیز ہوئی۔

فلم 'پٹھان' کے ذریعے شاہ رخ خان کی 4 سال بعد اسکرین پر واپسی ہوئی ہے۔