'پٹھان' نے باکس آفس کے 'دنگل' پر دی عامر خان کو پٹخنی، بالی ووڈ کی سب سے بڑی ہٹ بنی، 11 دنوں میں کمائے اتنے کروڑ!

نئی دہلی: پچھلا سال ہندی فلم انڈسٹری کے لئے بہت خراب رہا تھا۔ باکس آفس پر بڑے اسٹار اور بڑے بجٹ کی فلمیں فلاپ ہوگئی تھیں تو کئی بڑے فلمسازوں نے او ٹی ٹی کی طرف دیکھنا شروع کر دیا، لیکن شاہ رخ خان کی فلم 'پٹھان' نے پورا ماحول ہی بدل کر رکھ دیا۔ 'پٹھان' نے ہندی فلم انڈسٹری میں پھر سے جان پھونک دی ہے۔ اب اس نے کمائی کے معاملہ میں ایک نئی تاریخ رقم کرتے ہوئے ہندی فلموں کے شائقین کو جشن منانے کا موقع فراہم کیا ہے ۔

فلم 'پٹھان' نے باکس آفس کلیکشن کے معاملہ میں عامر خان کی فلم 'دنگل' کو پیچھے چھوڑ دیا ہے۔ اب یہ سب سے زیادہ کلیکشن کرنے والی ہندی فلم بن گئی ہے۔ تصویر : Instagram@iamsrk

ٹریڈ اینالسٹ ترن آدرش کے مطابق 'پٹھان' نے ہفتہ 4 فروری کو تقریباً 22.5 کروڑ روپے کی کمائی کی ، جس سے فلم کا ہندی ورژن کی کمائی تقریباً 387 کروڑ روپے تک پہنچ گئی ہے۔

وہیں اگر تمل اور تیلگو ورژن کے کلیکشن کو بھی شامل کرلیا جائے تو ہندوستان میں 'پٹھان' کی کل کمائی تقریباً 401.4 کروڑ روپے ہوجاتی ہے۔ اس طرح 'پٹھان' نے 'دنگل' کا 387 کروڑ کا ریکارڈ توڑ دیا ہے۔

شاہ رخ کی فلم بالی ووڈ کی سب سے بڑی بلاک بسٹر بن کر ابھری ہے، اب یہ 'کے جی ایف 2' اور 'باہوبلی 2' کے ریکارڈ توڑنے کی طرف بڑھ رہی ہے۔

ایسی امید ظاہر کی جارہی ہے کہ یہ اگلے 5 دنوں میں کے جی ایف 2 کا ریکارڈ توڑ دے گی۔ اگر 'پٹھان' کی کامیابی جاری رہی تو 'باہوبلی 2' (ہندی ورژن) 511 کروڑ روپے کے ریکارڈ کو بھی ٹکر دے گی۔

فلم نے بیرون ممالک میں بھی جم کر کمائی کی ہے۔ یش راج فلمز کے مطابق 25 جنوری کو ریلیز ہونے والی فلم 'پٹھان' کا دنیا بھر میں کل کلیکشن 780 کروڑ روپے سے تجاوز کر گیا ہے۔ اس کے گانے بھی کافی موضوع بحث رہے ہیں ۔