بڑی خبر: شاہ رخ خان خریدیں گے ایک اور کرکٹ ٹیم

بالی ووڈ کے بادشاہ شاہ رخ خان صرف فلمی دنیا کے اسٹار ہی نہیں ہیں بلکہ اس کے ساتھ ساتھ وہ ایک زبردست کامیاب بزنس مین بھی ہیں۔ شاہ رخ خان نے اپنے پاوں پروڈکشن اور اداکاری کے ساتھ ساتھ کرکٹ کی دنیا میں بھی پھیلا دیئے ہیں۔

شاہ رخ خان دو کرکٹ ٹیموں کے مالک ہیں اور اب خبر آرہی ہے کہ وہ تیسری ٹیم میں بھی سرمایہ کاری کرنے کے بارے میں سوچ رہے ہیں۔ خبروں کی مانیں تو انڈین پریمیر لیگ (آئی پی ایل) فرنچائزی کولکاتا نائٹ رائیڈرس کے مالک انگلینڈ اور ویلس کرکٹ بورڈ (ای سی بی) کے نئے ٹورنامنٹ ’دی ہنڈریڈ’ میں سرمایہ کاری کرنا چاہتے ہیں۔

دی ٹیلی گراف اخبار نے بتایا کہ شاہ رخ خان کی ملکیت والی کولکاتا نائٹ رائیڈرس 100 گیند والے ٹورنامنٹ میں سرمایہ کاری کے لئے تیار ہے۔ اس ٹورنامنٹ کو اس سال جولائی میں شروع ہونا تھا، لیکن کووڈ-19 وبا کے سبب اسے آئندہ سال کے لئے ملتوی کر دیا گیا ہے۔

واضح رہےکہ کولکاتا نائٹ رائیڈرس (کے کے آر) مالکان کی شراکت ویسٹ انڈیز میں ہونے والی ’کیریبین پریمیئر لیگ’ میں بھی ہے۔ کے کے آر نے 2015 میں ترینیداد فرنچائزی کو خریدا تھا۔

ہنڈریڈ لیگ میں 8 ٹیمیں حصہ لیں گی اور ہر ٹیم اپنے گھر پر 4 میچ کھیلےگی۔ لیگ میچوں کے بعد پلے آف ہوگا اور اس کے بعد چمپئن کا فیصلہ ہوگا۔ اس لیگ میں ہر اننگ میں 100 گیندیں پھینکی جائیں گی اور ہر 10 گیند کے بعد بلے باز اینڈ تبدیل کریں گے۔ گیند باز مسلسل 5 یا 10 گیندیں پھینک سکتا ہے۔