ہیرا تاجر نیرو مودی کے خلاف سوئٹزر لینڈ حکومت نے کی سخت کارروائی ، لگا کروڑوں کا دھچکہ

پنجاب نیشنل بینک کے ساتھ ہزاروں کروڑ روپے کا لون فراڈ کرنے کے ملزم اور منی لانڈرنگ کیس میں مفرور ہیرا تاجر نیرو مودی کے خلاف سوئٹزر لینڈ کی حکومت نے بڑی کارروائی کی ہے ۔ حکومت نے نیرو مودی کے چار بینک اکاونٹس کو منجمد کردیا ہے ۔

سوئٹرزلینڈ حکومت کی جانب سے کی گئی اس کارروائی کے بعد نیرو مودی سے وابستہ لوگ بھی ان کے اکاونٹ میں جمع رقم کا استعمال نہیں کرسکتے ہیں ۔ حکومت کی اس کارروائی کے بعد نیرو مودی کو کل 6 ملین ڈالر کی املاک سے ہاتھ دھونا پڑا ہے ۔

بتادیں کہ ہندوستان کے سرکاری بینکوں سے کروڑوں روپے کی جعل سازی کرکے لندن بھاگ گئے نیرو مودی پر شکنجہ کستا جا رہا ہے ۔ لندن کی ویسٹ منسٹر عدالت نے نیرو مودی کی ضمانت کی عرضی چوتھی مرتبہ خارج کردی ہے ۔ ایسے میں اس کو ابھی لندن کی جیل میں ہی رہنا پڑے گا ۔

خیال رہے کہ نیرو مودی کئی بینکوں کو 13 ہزار کروڑ روپے کا چونا لگا کر تقریبا 15 ماہ سے فرار ہے ۔ نیرو مودی کی سازش کی وجہ سے پی این بی بینک کی اقتصادی رفتار بھی رک گئی تھی ۔ شیئر گر کر زمین پر پہنچ گیا تھا ۔

اس فراڈ کے انکشاف کے بعد ہر طرف ہنگامہ مچ گیا تھا ۔ اس درمیان نیرو مودی ملک چھوڑ کر فرار ہوگیا ، لیکن تبھی سے ہندوستانی حکومت نیرو مودی کو واپس لانے کی کوشش میں مصروف ہے ۔