افغانستان کی ملالہ اور چنڈی گڑھ کے نیرج کی پریم کہانی سے کیوں بگڑا پاکستان؟ طالبان پر بھی دھمکی دینے کا الزام

افغانستان کی ملالہ یوسف کو چندی گڑھ کے نیرج سے پیار ہوا اور اس نے اس کے ساتھ شادی کرلی۔ دونوں کی شادی کو دو سال ہوگئے ہیں۔ شادی کے بعد دونوں بہت خوش تھے، لیکن اب دونوں خوف کے سائے میں جینے کو مجبور ہے۔

دراصل کچھ لوگ ایسے ہیں جنہیں ان کی یہ شادی منظور نہیں ہے اور وہ ان کی جان کے دشمن بن چکے ہیں۔ اب ان دونوں کو جان سے مارنے کی دھمکیاں مل رہی ہیں۔ دونوں شوہر بیوی پریشان ہیں، کیونکہ انہیں مسلسل فون کالس آرہے ہیں، جس میں جان سے مارنے کی بات کہی جارہی ہے۔

ملالہ کے مطابق، اس کے چچا ان کی فیملی کو مشتعل کر رہے ہیں، کیونکہ ملالہ کے والد نے اس کی شادی اس کی پیدائش سے پہلے ہی اپنے چھوٹے چچا زاد بھائی یعنی اس کے چچا کے بیٹے کے ساتھ طے کر دی تھی، لیکن ملالہ جب بڑی ہوئی تو اس نے اس شادی سے انکار کردیا اور ہندوستان میں نیرج ملک کے ساتھ شادی کرلی۔

اب ملالہ اور نیرج کے پاس صرف طالبان ہی نہیں، بلکہ پاکستان، ایران اور دیگرکئی ممالک سے بھی دھمکی آمیز فون کال آرہے ہیں۔ فون پر سب یہی کہتے ہیں کہ غیر مسلم سے شادی کرنے کی سزا صرف موت ہے اور تمہیں بھی یہی سزا دی جائے گی۔

دونوں نے پولیس کو بھی اس کی شکایت درج کرائی ہے اور پولیس کی طرف سے بھی انہیں سیکورٹی دی گئی ہے، لیکن پھر بھی انہیں اپنی جان کا خطرہ ستا رہا ہے۔ نیرج ملک نے بتایا کہ ان دھمکیوں کی وجہ سے انہیں گھر سے باہر نکلنے میں بھی ڈر لگتا ہے۔