جموں۔کشمیر: بڈگام میں خاتون کا سنسنی قتل، لاش کو کئی ٹکڑوں میں کاٹ کر دفنایا، ملزم گرفتار

سری نگر: جموں و کشمیر کے بڈگام ضلع میں ایک خاتون کے قتل کا سنسنی خیز واقعہ سامنے آیا ہے۔ یہاں ملزم کو قتل کرنے کے بعد اس کی لاش کے کئی ٹکڑے کرکے لاش کے اعضاء کو مختلف مقامات پر دفن کردیا گیا۔

یہ واقعہ منظر عام پر آنے کے بعد لوگوں کے رونگٹے کھڑے ہو گئے۔ پولیس نے مقدمہ درج کر کے تفتیش شروع کر دی اور ایک شخص کو گرفتار کر لیا۔

پولیس ترجمان کے مطابق 8 مارچ کو وسطی کشمیر میں سوئی باغ پولیس چوکی کو تنویر احمد خان کی جانب سے ایک درخواست موصول ہوئی، جس میں انہوں نے بتایا کہ 7 مارچ کو ان کی بہن کوچنگ کے لیے روانہ ہوئی تھی لیکن گھر واپس نہیں آئی۔

ترجمان نے کہا کہ درخواست ملنے کے بعد پولیس نے گمشدگی کی رپورٹ درج کر کے تفتیش میں مصروف ہو گئی۔ تفتیش کے دوران، پولیس نے موہن پورہ بڈگام کے رہنے والے شبیر احمد وانی سمیت متعدد مشتبہ افراد کو حراست میں لیا ہے۔

پولیس کے ایک ترجمان نے بتایا کہ مسلسل پوچھ گچھ کے بعد احمد نے جرم میں ملوث ہونے کا اعتراف کر لیا ہے۔ اس نے پولیس کو بتایا کہ اس نے خاتون کی لاش کے کئی ٹکڑے کیے اور جسم کے اعضاء کو مختلف مقامات پر دفن کر دیا۔

پولیس کا کہنا تھا کہ احمد کے انکشاف کے بعد لاش کے اعضاء برآمد کر لیے گئے ہیں۔ پولیس ترجمان کے مطابق فی الحال میڈیکل اور قانونی کارروائیاں جاری ہیں اور مزید تفتیش جاری ہے۔