جموں و کشمیر : دراندازی کررہے تین دہشت گردوں کو فوج نے کیا ڈھیر، دیکھئے برآمد ہتھیاروں کا ذخیرہ

ذرائع کے مطابق فوج کو ایل او سی کے قریب دہشت گردوں کے چھپے ہونے کے بارے میں پتہ چلا تھا ، جس کے بعد فوج کی ایک ٹیم نے علاقہ میں دبش دی ۔ دہشت گروں کو جیسے ہی علاقہ میں فوج کی موجودگی کا پتہ چلا ، انہوں نے گولہ باری شروع کردی ، جس کے بعد فوج کی جانب سے جوابی کارروائی کی گئی ۔

انکاونٹر میں فوج کے جوانوں نے تین ملی ٹینٹوں کو مار گرایا ، جن کے پاس سے بھاری تعداد میں ہتھیار اور گولہ بارود برآمد ہوئے ہیں ۔

یہ دہشت گرد حال ہی میں ایل او سی کی سرحد پار کرکے ہندوستان میں داخل ہوئے تھے ۔ یہ پاکستان کے قبضہ والے کشمیر سے ہندوستان کے علاقہ میں آئے تھے ، جس کی خبر ہوتے ہی فوج نے اپنی مہم شروع کردی تھی ۔

مارے گئے دہشت گردوں کے پاس سے پانچ اے کے 47 ، آٹھ پستول اور 70 ہتھ گولے برآمد کئے گئے ہیں ۔

چنار کور کے کمانڈر جنرل ڈی پی پانڈے نے کہا کہ دہشت گردوں کے پاس سے پاکستانی کرنسی بھی برآمد ہوئی ہے ۔ انہوں نے بتایا کہ گزشتہ چار دنوں سے تلاشی مہم چل رہی تھی ۔