J&K News : ڈل جھیل میں دلکش مناظر ، برقی قمقموں سے سجے شکارے متعارف، دیکھئے تصاویر

کشمیر کی شہرہ آفاق ڈل جھیل ویسے تو اپنے سحر انگیز مناظر کے لئے پوری دنیا میں مشہور ہے ، لیکن 25 جنوری کی شام یوم جمہوریہ سے پہلے ان مناظر میں ایک اور دلکش رنگ بھر گیا ۔ جھیل میں برقی قمقموں سے سجے شکارا سے نکلنے والی روشنی جیسے سرما کے ٹھنڈے پانی میں نہا کر اپنی چمک کے ذریعہ خوشی کا اظہار کررہی تھی۔ (تصاویر اور رپورٹ : میر شبیر احمد)

جھیل کے کناروں پر سیاح تو سیاح مقامی لوگ بھی ایک لمحے کے لئے سردی کے اس موسم میں بھی گرمی محسوس کررہے تھے۔ بلیوارڈ روڈ کے گھاٹ نمبر ایک پر یہ شکارا تیرتے تیرتے آگے بڑھنے لگے تو یہاں سے گزرنے والا ہر شخص رک کر اس نظارے سے لطف اندوز ہورہا تھا۔

سرینگر اسمارٹ سٹی پراجیکٹ کے تحت 80 شکارے مستقل طور پر قمقموں سے سجائے گئے ہیں۔ ڈائریکٹر ٹورزم کشمیر کی این اتو نے کہا کہ جھیل میں اس کے ذریعے سیاحوں کی دلچسپی بڑھانے کے لئے ایک اور دلکش رنگ بھر دیا گیا ہے۔

اس موقع پر ایک مقامی ٹور گائیڈ نے کہا کہ اس طرح کے اقدام کے ذریعہ سیاحوں کی تفریح کا ایک اور سامان میسر رہے گا ۔ تاکہ شام کے اوقات میں وہ جھیل میں مزہ لے سکیں۔

کشمیر میں سرما کے دوران دسمبر مہینے میں سیاحوں کی آمد ڈیڑھ لاکھ کے قریب پہنچ گئی تھی ، لیکن ملک میں کووڈ معاملات میں اضافے کے بعد ان میں کمی آگئی ہے ۔

ڈائریکٹر ٹورزم کا کہنا ہے کہ کمی کے باوجود کشمیر میں سیاحوں کی آمد جاری ہے اور فروری میں کووڈ معاملات میں کمی کے ساتھ ہی ایک بار پھر ڈل جھیل سیاحوں کا مرکز بن جائے گی ۔