Salman Khan کو کشمیری دستکار کا محبت نامہ، ریشم کے دھاگوں سے بنائی تصویر، دیکھئے PHOTOS

بالی ووڈ اداکار سلمان خان کے تو ہزاروں مداح ہیں لیکن سرینگر کے دستکار محمد حسین جیسا شاید ہی کوئی فین ہو۔ محمد حسین نے ریشم کے مہین دھاگوں میں سلمان خان کو اتار کر ان کے تئیں اپنی بے پناہ محبت کا اظہار کیا ہے۔ حسین پیشے سے قالین باف ہیں ، لیکن انھوں نے سلمان خان کی محبت میں کووڈ کے مندی کے دور میں بھی 6 ماہ دن رات ایک کرکے ایک لاکھ روپے صرف کرکے سلمان خان کی تصویر ریشم کے دھاگوں میں پرو کر تیار کی۔ (تصویر اور رپورٹ : میر شبیر احمد)

فتح کدل سرینگر سے تعلق رکھنے والے محمد حسین کا کہنا ہے کہ وہ سلمان خان فین ہیں اور سال 2019 اکتوبر میں انھوں نے سلمان خان کا ایک پوسٹر خرید لیا اور اسے تیار کرنے کا فیصلہ کیا۔ قالین بافی کی مہارت کا استعمال کرکے انھوں نے پہلے اس کی کاغذ پر کووڈنگ کی جسے عام طور پر کشمیر میں تعلیم کہتے ہیں۔

اس کے بعد محمد حسین نے اس کے لئے ریشم کا دھاگہ خریدا۔ 45 رنگوں کا ریشم کا دھاگہ ایک غریب دستکار کے لئے آسان نہیں لیکن کووڈ کی سخت مندی کے باوجود انھوں نے یہ کام جاری رکھا اور پنتالیس رنگ کے دھاگوں کا استعمال کرکے اسے چھ ماہ میں تیار کیا۔

حسین کہتے ہیں کہ اس تصویر میں ایک مربع انچ میں 745 گانٹھ لگے ہیں اور پوری تصویر 6 لاکھ سے زیادہ ناٹھ یعنی گانٹھ لگے ہیں۔

حسین کے رشتہ دار فاروق لون کے مطابق یہ تصویر تیار کرکے انھوں نے گھر پر سنبھال کر رکھی تھی اور جب ان کی نظر اس پر پڑی تو انھوں نے اسے عام کرنے کا فیصلہ کیا۔ محمد حسین نے کی بے لوث محبت اور فنکارانہ صلاحیت اس تصویر سے صاف جھلکتی ہے۔

حسین کہتے ہیں کہ وہ بس سلمان خان سے محبت کا اظہار کرنا چاہتے ہیں ۔ جب ان سے پوچھا کہ کیا وہ سلمان خان کو کوئی پیغام بھیجنا چاہتے ہیں تو انھوں نے کہا کہ انھوں نے اپنے فن کے ذریعے اپنی محبت کا اظہار کیا ہے ۔ بس وہ اتنا چاہتے ہیں کہ اگر ہوسکے تو اپنی دریا دلی کے لئے مشہور سلمان خان مشکل میں پھنسے کشمیری دستکاری صنعت کو فروغ دینے میں مدد کریں ۔