سرینگر میں سکھ برادری نے لاش کو ساتھ لیکر کئی علاقوں میں جاکر کیا مظاہرہ اور سیول سیکریٹیریٹ کے سامنے دیا دھرنا

سرینگر میں آج سکھ برادری سے تعلق رکھنے والے سینکڑوں افراد نے احتجاجی مارچ کیا۔ یہ احتجاج کل سرینگر کے مضافات میں واقع اسکول میں دو اساتذہ کو گولی مار کر ہلاک کرنے کے خلاف کیا گیا ۔ مارے گئے افراد میں ہائر اسکنڈری اسکول سنگم عیدگاہ کی خاتون پرنسپل سُپِندر کور بھی شامل تھی۔

مرحومہ سُپِندر کی لاش کو لیکر آج سکھ برادری کے لوگ جلوس کی صورت میں نکلے اور احتجاجی مارچ شروع کیا۔ احتجاجی افراد مہلوک کے قاتلوں کو کیفر کردار تک پہنچانے کا مطالبہ کررہے تھے اور ساتھ میں ملیٹنٹ تنظیم ٹی آر ایف کے خلاف بھی نعرہ بازی کر رہے تھے۔ احتجاجی حکومت سے بھی خفا ہیں انھوں نے سرینگر میں واقع سیول سیکریٹیریٹ کے سامنے نعرہ بازی کی اور دھرنا دیا۔

ایک احتجاجی شخص سُکھویندر کا کہنا تھا کہ وہ یہ ظلم برداشت نہیں کریں گے ۔ انھوں حکومت پر عام لوگوں کی حفاظت کرنے میں ناکام ہونے کا الزام لگایا۔ سیول سیکریٹیریٹ کے سامنے کچھ دیر احتجاج کرنے کے بعد مرحومہ کی لاش کو کئی علاقوں سے گزار کر کرن نگر میں واقع شمشان میں لایا گیا اور یہاں پر اُن کی آخری رسومات انجام دی گئیں۔

اُدھر آج دن بھر آلوچہ باغ میں ان کے لواحقین کے گھر پر سیاسی لیڈروں کا تانتا بندھا رہا۔ لیفٹنٹ گورنر منوج سنہا بھی انکے گھر گئے لیکن میڈیا سے بات کرنے دے گُریز
کیا۔

سابق وزیر اعلٰی عمر عبداللہ نے بھی لواحقین کے گھر جاکر اظہار تعزیت کی ۔ انھوں نے کہا کہ سرکار اقلیتوں پر حملوں کے اندیشے سے خبر دار تھی لیکن پھر بھی کچھ نہیں کر پائی۔

کانگریس لیڈروں کے ساتھ ساتھ اپنی پارٹی کے صدر الطاف بخاری نے بھی غم زدہ خاندان کے ساتھ اظہار تعزیت کی کشمیر میں اس سال ابھی تک 29 عام شہری مارے گئے ہیں جن میں سے 10 غیر مسلم تھے اور باقی مقامی مسلمان مارے گئے۔