اے ایم یو میں تین گولڈ میڈل حاصل کر کے انشاء ظہور نے کشمیری طلبہ کے لئے قائم کی مثال

منزل کی جستجو میں کیوں پھر رہا ہے راہی۔ اتنا عظیم بن جا کہ منزل تجھے پکارے۔ جی ہاں یہ شعر شیخ محلہ بونگام، شوپیان کشمیر کی رہنے والی انشاء ظہور پر سو فیصد صادق آتا ہے۔ انشا ظہور علی گڑھ مسلم یونیورسٹی میں ایگریکلچرل سائنس میں ڈاکٹریٹ کررہی ہیں۔ حال ہی میں منعقد اے ایم یو کے جلسہ تقسیم اسناد میں انہوں نے تین تین گولڈ میڈل حاصل کیے۔ تین گولڈ میڈل ایک ساتھ حاصل کرنے والی انشاء ظہور کشمیر کی پہلی طالبہ ہیں ۔ انشاء کی یہ کامیابی ان کی لگن ، والدین کی شفقت اور اساتذہ کی محنت کا ثمرہ ہے۔

علی گڑھ مسلم یونیورسٹی کے اقامتی ہال بیگم سلطان جہاں میں رہ کر اپنی تعلیم حاصل کررہی انشاء ظہور کی ابتدائی تعلیم ان کے آبائی وطن شوپیان کے مکتبہ جامعہ سے ہوئی ہے ۔

اس کے بعد بی ٹیک کی تعلیم اسلامک یونیورسٹی سائنس اینڈ ٹیکنالوجی سے حاصل کرکے ایم ٹیک میں انشاء ظہور نے علی گڑھ مسلم یونیورسٹی میں قدم رکھا اور پھر پیچھے مڑ کر نہیں دیکھا۔

اپنی اس کامیابی سے خوش انشا کہتی ہیں کہ وہ مستقبل میں بھی اپنی سخت محنت جاری رکھیں گی اور نئی بلندیوں کے حصول میں وہ کوئی کسر نہیں چھوڑیں گی۔

اس سال مکمل ہوئے ایم ٹیک کے بعد انھیں فوراً ریسرچ میں داخلہ ملا اور جلسہ تقسیم اسناد میں 3 گولڈ میڈل ملے جس کے گواہ ان کے والدین بھی بنے۔

انشاء ظہور کو ان کی نمایاں کامیابی کے لئے ملے میڈل کو وہ اپنے اساتذہ اور والدین کے نام منسوب کرنا چاہتی ہیں۔ وہیں وہ کشمیرکے نوجوان طبقہ سے اپیل بھی کرتی ہیں کہ تعلیم کو ہی اپنی زندگی بنا لیں ،کامیابی خود بخود ان کے قریب ہوگی۔

انشاء ظہور کو جاننے والے سبھی ان کی لگن اور محنت کے قائل ہیں۔ بیگم سلطان جہاں ہال میں ان کے ساتھ رہ رہیں طالبات نے بتایا کہ ان کی دوستی صرف کتابوں سے ہے اور وہ کھیل بھی ایسے ہی کھیلتی ہیں جس میں ادبی ماحول ملے ۔بہت ساری لڑکیاں انھیں اپنا رول ماڈل مانتی ہیں اور کہتی ہیں کہ وہ ان کی زندگی سے بہت کچھ سیکھتی ہیں۔

وہ کہتی ہیں کہ آج جہاں لڑکوں اور لڑکیوں میں فرق کیا جاتا ہے وہاں ایک لڑکی کی یہ کامیابی یقیناً طالبات کو آگے بڑھنے کا حوصلہ دیگی ۔

محنت ہی کامیابی کی کنجی ہے یہ ثابت کیا ہے تعلیم کے لئے کشمیر سے علی گڑھ تک پہنچی انشاء ظہور نے جو اپنے تمام خوابوں کو پورا کرنے کے ساتھ ہی اکیڈمک میدان میں اپنا مستقبل سنوار نا چاہتی ہیں اور کشمیرکی لڑکیوں سے بھی یہی اُمیدکرتی ہیں کہ وہ بھی محنت اور لگن سے اپنے لئے کامیابی کے راستے کھولیں۔

کیونکہ کسی نے کیا خوب کہا ہے کہ ایک لڑکی کے تعلیم یافتہ ہونے سے تو ایک خاندان تعلیم یافتہ ہوجاتا ہے۔