ادارہ بیت الیتیم بغیر کسی چندے کے25 سال سے یتیم اور مسکین بچوں کی تعلیم وتربیت کا کر رہا ہے انتظام

اورنگ آباد میں بیت الیتیم نامی ایک ایسا ادارہ ہے جو یتیموں اور مسکینوں کی کفالت کرتا ہے۔ ان کی تعلیم و تربیت کا بندوبست کرتا ہے۔ اب تک اس ادارے سے سینکڑوں بچے فارغ ہوچکے ہیں ۔ یہ کام پچھلے 25 برسوں سے جاری ہے۔

یہ ایک ایسا ادارہ ہے جہاں موجودہ وقت میں اسٹاف کے علاوہ پچاس سے زیادہ طلبا موجود ہیں۔

ان کے طعام و قیام اور تعلیم و تربیت پر لاکھوں روپئے خرچ ہوتے ہیں۔ لیکن بیت الیتیم کے نام پر نہ ہی کوئی چندہ جمع کیا جاتا ہے اور نہ ہی کسی سفیر کو چندے کے لیے روانہ کیا جاتا ہے ۔

اورنگ زیب عالمگیر کی تعمیر کردہ شاہی مسجد کے سرائے خانے میں الامان ٹرسٹ کے تحت پچھلے پچیس برسوں سے چل رہے ادارہ بیت الیتیم میں یتیم اور مسکین بچوں کے لیے طعام و قیام اورتعلیم وتربیت کا مفت انتظام ہے۔

بیت الیتیم کے ذمہ داروں کا کہنا ہے کہ اس ادارے سے فارغ طلبا زندگی کےمختلف شعبوں میں کامیاب زندگی بسر کررہے ہیں۔

بیت الیتیم کے ذمہ دار اس ادارے کے ذریعے ایک ایسے مرکز کے قیام پر بھی غورکررہے ہیں جہاں سے طلبا کو آئی اے ایس، آئی پی ایس اور آئی ایف ایس کے امتحانات کی ٹریننگ دی جاسکے۔ جلد ہی اس پر عمل آوری کی امید ہے۔

بیت الیتیم کے بچے شہر کے معیاری تعلیمی اداروں اورکالجوں میں تعلیم حاصل کرتے ہیں۔ اس کےعلاوہ خود بیت الیتیم میں اساتذہ بچوں کو ٹیوشن پڑھاتے ہیں۔

ادارے میں کمپیوٹر کی تعلیم کے ساتھ عصری اوردینی تعلیم پر بھی توجہ دی جاتی ہے۔

آٹھ افراد پرمشتمل بیت الیتیم کا عملہ خدمت خلق میں مصروف ہے۔

ان کےعلاوہ بچوں کی طبی نگہداشت کے لیے چار ڈاکٹر اپنی رضاکارانہ خدمات انجام دیتے ہیں۔