راجستھان کے کوٹا سے رانچی لوٹے سینکڑوں طلبہ وطالبات ، چہرے کی مسکراہٹ تھی قابل دید ، دیکھیں تصاویر

راجستھان کے کوٹا سے چلی اسپیشل ٹرین سے آج ہٹیا پہنچے طلبہ کے چہروں پر خوشی کی جھلک دیکھنے کو ملی ۔ تمام طلبہ نے اپنے وطن پہنچ کر راحت کی سانس لیتے ہوئے ریاست کے وزیر اعلی ہیمنت سورین کا شکریہ ادا کیا ۔

لاک ڈاؤن کے دوران جمعہ یکم مئی سے شروع ہوئے دیگر ریاستوں سے جھارکھنڈ کے لوگوں کی آمد کا سلسلہ ہفتہ کے روز بھی جاری رہا ۔ رانچی کے ہٹیا ریلوے اسٹیشن پر جمعہ کی طرح ہی انتظامیہ کی جانب سے خصوصی انتظامات دیکھنے کو ملا ۔

اس ٹرین سے رانچی آنے والے تمام طلبہ کو بسوں کے ذریعہ رانچی کے دھروا میں واقع پارس اسپتال میں بھیجا گیا ۔ وہیں ٹرین میں دیگر اضلاع کے طلبہ بھی سوار تھے ۔

چودہ سو سے زائد طلبہ کے ساتھ پہنچی ٹرین سے نکلنے والے طلبہ و طالبات کو فوڈ پیکٹ اور گلاب کے پھول دئے گئے ۔ وہیں اسٹیشن پر ٹھنڈر اسکریننگ کی گئی ۔ بچوں کے چہرے پر رانچی پہنچنے کے بعد مسکان دیکھنے کو ملی ۔

کورونا وبا کے ماحول میں اپنوں کے ساتھ رہنا کسی کو بھی تقویت بخشتا ہے ۔ شاید یہی وجہ ہے کہ بچے یہ بھی کہتے نظر آئے کہ یہاں آکر سکون ملا ۔ وہیں کچھ طلبہ نے کہا کہ کھانے کو لے کر پریشانی ہوئی ۔ تاہم انہوں نے حکومت کے ذریعہ انتظامات پر خوشی کا اظہار کیا ۔ اس موقع پر وزیر اعلی ہیمنت سورین نے خوشی کا اظہار کرتے ہوئے یے تمام طلبہ کو مبارکباد پیش کی ۔

واضح رہے کہ جمعہ کو مزدوروں کے آنے کے بعد سنیچر کو طلبہ کی آمد یہ بتاتا ہے کہ ریاستی حکومت عوامی مسائل کے تئیں کتنی سنجیدہ ہے ۔ یہی وجہ ہے کہ وزیر اعلی نے خوشی کا اظہار کیا اور تمام طلبہ کو مبارکباد پیش کی ۔

ٹرین کے ذریعہ طلبہ کی آمد اور پھر انہیں بسوں کے ذریعہ ان کی منزل مقصود تک پہنچانا یہ کسی چیلنج سے کم نہیں ہے ، اس کے باوجود ضلع انتظامیہ نے اسے بہتر طریقے سے انجام دیا ۔ رانچی کے ڈپٹی کمشنر نے کہا کہ جتنے بھی طلبہ وطالبات ہیں ، انہیں ان کے گھروں تک پہنچایا جائے گا ۔ ( تصاویر اور رپورٹ : نوشاد عالم ) ۔