نوابین بھوپال کے ذریعہ مکہ مکرمہ اور مدینہ میں تعمیر رباط کیلئے قرعہ اندازی

نوابین بھوپال کے ذریعہ مکہ مکرمہ اور مدینہ میں تعمیر کی گئیں رباط کے لئے بھوپال میں قرعہ اندازی کا انعقاد کیا گیا۔ قرعہ اندازمیں ریاست بھوپال کے عازمین حج نے شرکت کی اور اپنے نام کا انتخاب ہونے پر اللہ کا شکریہ ادا کیا۔

ریاست بھوپال کا شمار ہندستان کی ان چند ریاستوں میں ہوتا ہے ، جن کے نوابین نے اپنی ریاست کے عازمین حج کے قیام کے لئے مکہ مکرمہ اور مدینہ منورہ میں رباط کی تعمیر کی تھی ۔ ریاستی عہد میں ان ر باط میں عازمین حج کے قیام و طعام کا انتظام جس انداز میں کیا جاتا تھا ، اسی اندا ز میں اب بھی کیا جاتا ہے ۔

ریاستی عہد میں یہ سارے انتظامات ریاست کی جانب سے کئے جاتے تھے ، لیکن اب یہ سارے انتظامات شاہی اوقاف بھوپال کی زیر نگرانی کیا جاتا ہے۔

حرم شریف کی توسیع کے سبب بھوپال کی رباط بھی متاثر ہوئی ۔ اس مرتبہ شاہی اوقاف کی جانب سے مکہ مکرمہ میں صرف دو سو عازمین حج کے قیام کا انتظام کیا گیا ہے ۔ جبکہ مدینہ منورہ کی رباط میں ریاست کے سبھی عازمین حج کے ٹھہرنے کا انتظام کیا گیا ہے ۔

ریاست بھوپال موجودہ مد ھیہ پردیش کے تین اضلاع بھوپال ،رائے سین اور سیہور پر مشتمل تھی ۔ رباط قرعہ کے لئے ان تین اضلاع کے عازمین حج کے درمیان قرعہ اندازی کی گئی ۔

ان تینوں اضلاع سے اس سال جو عازمین حج سفر حج پر روانہ ہوں گے ، ان کی مجموعی تعداد 665 ہے ، جن میں سے مکہ ربا ط میں ان دو سو عازمین حج کے قیام کا انتظام کیا جائے گا ، جن کا قرعہ اندازی کے ذریعہ انتخاب کیا گیا ہے۔

قرعہ اندازی سے قبل بھوپال کے مفتی ابوالکلام اور قاضی شہر بھوپال نے حج کے فضائل اور رباط کی تعمیر پر تفصیلی روشنی ڈالی اس کے بعد قرعہ اندازی کے عمل کو انجام دیا گیا ۔ عازمین حج نے رباط قرعہ اندازی میں اپنے نام کا انتخاب ہونے پر اللہ کا شکر ادا کیا۔

خیال رہے کہ ریاست بھوپال کے جن عازمین حج کو رباط کی سہولیات ملتی ہیں ، ان کے سفر حج کے اخراجات تقریبا 75 ہزار روپیہ کم ہو جاتے ہیں ، جس کی وجہ سے ہر شخص کی خواہش ہوتی ہے کہ اس کے نام قرعہ اندازی میں نکل آئے ، تاکہ سفر حج کے اخراجات کم ہو جائیں ۔