چندریان 2 : خلا میں تاریخ رقم کرنے کے ساتھ ایسے عام لوگوں اور بچوں کے قریب پہنچا اسرو

چندریان 2 کے لینڈر وکرم کی چاند کی سطح پر سافٹ لینڈ کی گھڑی قریب آچکی ہے ۔ تاریخ رقم کرنے کے قریب پہنچ چکا اسرو اپنے اس مشن کو عام لوگوں کے درمیان پہنچانے میں بھی کامیاب رہا ہے ۔ چندریان 2 کی لانچنگ پر اسرو سینٹر میں کئی اہم لوگوں کو مدعو کیا گیا تھا ۔

اسرو نے سوشل میڈیا پر اپنے اس مشن کی اس طرح برانڈنگ کی کہ آج ملک میں بہت بڑی تعداد میں لوگ چندریان 2 کے بارے میں نہ صرف جانتے ہیں بلکہ اس سے وابستہ باتیں سوشل میڈیا پر شیئر بھی کررہے ہیں ۔

اس پورے مشن کے توسط سے اسرو نے خلائی سائنس میں تو لمبی چھلانگ لگائی ہی ہے ، ساتھ ہی میں اس نے اپنی روایتی اور سرکاری شبیہ کو بھی بدل کر رکھ دیا ہے ۔ چندریان 2 مشن شروع ہونے سے پہلے اور بعد میں لوگوں کو اپنے ساتھ جوڑنے کیلئے اسرو نے کئی پہل کی ہے۔

سوشل میڈیا پر اس نے کوئز ، تصاویر کے علاوہ چندریان کے ذریعہ بھیجی گئی تصویروں کو بھی لوگوں کے ساتھ شیئر کیا ، جس کی وجہ سے بڑی تعداد میں لوگوں کی دلچسپی اس میں پیدا ہوئی اور وہ اسرو کے اس مشن کے ساتھ وابستہ ہوئے ۔

اس مرتبہ اسرو اس سے بھی آگے بڑھ گیا ۔ اس نے عام لوگوں کے ساتھ اسکولی بچوں کو بھی اپنے ساتھ جوڑا اور ان کیلئے کئی طرح کے کوئز شروع کئے ۔

گزشتہ ماہ سے اسرو نے چندریان 2 مشن کو لے کر بڑے پیمانے پر سوشل میڈیا پر مہم شروع کی ، جس میں اس نے اہمیت کے ساتھ لوگوں کو اپنے ساتھ جوڑنے پر توجہ دی ۔