چندریان -2 کے آربٹرنے بھیجی چاند کی ایسی تصویر، جسے دیکھ کرآپ ہوجائیں گے حیران

انڈین اسپیس ریسرچ آرگنائزیشن (اسرو) کا چندریان-2 بھلے ہی چاند پراترنےکے بعد کہیں بھٹک گیا ہو، لیکن اس آربٹرمسلسل چاند سے متعلق اہم اطلاعات زمین پر بھیج رہا ہے۔ اسرو نے چندریان-2 کے آربٹرمیں لگے ہائی ریزولیشن کیمرے سے لی گئی تصویریں جاری کی ہیں۔ان تصویروں میں چاند کی سطح بے حد خوبصورت نظرآرہی ہے۔ چاند کی سطح پربڑے اورچھوٹے گڈھے واضح طورپر نظرآرہے ہیں۔

اسرو نے آربٹرمیں لگے ہائی ریزولیشن کیمرے سے جو تصویریں جاری کی ہیں، وہ بتاتی ہیں کہ آربٹر بہترطریقے سے کام کررہا ہے۔ آربٹرہائی ریزولیشن کیمرہ چاند کا چکرلگاتے ہوئے زمین پراسرو کو بہتر تصویریں بھیجتا رہتا ہے۔ یہ پینکرومیٹک بینڈ (800-450 این ایم) پرچلتا ہے۔

چندریان -2 کے لینڈر اورروور سے چاند کی سطح کے فزیکل آبزرویشن ڈاٹا نہیں ملنے کے سبب اسرو نے کہا ہے کہ سوڈیم، کیلشیم، ایلومنیم، سلکان، ٹائٹینیم اور آئرن جیسے عناصرکا پتہ لگانےکے لئے آربٹرکو جیسے کام کرنا چاہئے، وہ ویسے ہی کام کر رہا ہے۔

اسرو کے مطابق وکرم لینڈر کی تلاش اوراس سے رابطہ کرنے کی کوششوں میں مصروف امریکی خلائی ایجنسی ناسا نے کہا ہے کہ اب تک وکرم سے کوئی ڈاٹا نہیں ملا ہے۔

سات ستمبرکو چندرما کی سطح پر سافٹ لینڈنگ سے کچھ منٹ پہلے ہی لینڈروکرم کا زمینی اسٹیشن سے رابطہ ٹوٹ گیا تھا۔ اس کے بعد سے بنگلورواقع خلائی ایجنسی لینڈر سے رابطہ کرنے کی کوششیں کررہی ہے۔ حالانکہ چندرما پررات شروع ہونے کے سبب 10 دن پہلے ان کوششوں کو روکنا پڑا تھا۔