معصوم بچی کے ساتھ پیش آئے حادثے نے شہر کو کیا شرمسار، خون سے لت۔پت حالت میں ملی لڑکی۔۔

کولکاتہ میں نو سالہ بچی کے ساتھ کی گئی درندگی نے شہر کے لوگوں کو شرمسار کردیا ہے۔ لوگوں میں غم و غصہ ہے اور قصورواروں کو سخت سزا دینے کا مطالبہ کررہے ہیں۔

وہیں بچی کے والدین کے لئے یہ صدمہ برداشت کرنا مشکل ہے کہ ان کی اکلوتی اولاد دنیا کو الوداع کہہ کر ان کی ہنستی مسکراتی زندگی کو ویران کر گئی ہے۔

شہر کے شوبھا بازار کے رہائشی رتن ساؤ اپنی اہلیہ و بیٹی کے ساتھ اپنے قریبی رشتے دار یعنی بچی کے ماموں کے گھر جو شہر کے جوڑا بگان میں ہے گھومنے کے لئے آئے تھے ماما کے گھر آنے کے بعد ان کی بیٹی اپنے ہم عمر بچوں کے ساتھ کھیلنے میں مصروف ہوگئی۔ کچھ دیر بعد گھر والوں کو احساس ہوا کہ بچی گھر میں نہیں ہے۔

علاقے میں تلاش شروع کی گئی لیکن بچی کا کچھ پتہ نہیں چلا۔ گھر والے رات کے وقت پولیس اسٹیشن میں بچی کی گمشدگی کی رپورٹ درج کرانے کے لئے پہنچے لیکن گھر والوں کے مطابق پولیس نے چوبیس گھنٹے انتظار کرنے کی صلح دی اور گھرجانے کو کہا۔

چوبیس گھنٹوں بعد جب پولیس نے تفتیش شروع کی تو ماما کے گھر کے قریب ایک خالی عمارت کی چھت پر نو سالہ بچی کی لاش خون میں لت پت حالت میں ملی۔

بچی کا گلہ کاٹ کر موت کے گھاٹ اتارا گیا تھا جس عمارت سے بچی کی لاش ملی وہ خالی عمارت تھی۔

گھر کے سامنے والی عمارت میں ہی بیٹی کو موت کے گھاٹ اتارا گیا اور کسی کو کانوں کان خبر بھی نہیں لگی۔ دل دہلا دینے والے اس خوفناک حادثے سے علاقے کے لوگوں میں خوف و ہراس ہے لوگ قصور واروں کو سخت سزا دینے کا مطالبہ کررہے ہیں۔

ریاستی وزیر ششی پانجا نے متاثرہ خاندان سے ملاقات کرتے ہوئے قصورواروں کو سخت سزا دلانے کا یقین دلایا ہے۔