حامد انصاری کے استقبال میں مراقش سے ہوئی بڑی غلطی ، ہند ، پاک اور بنگلہ دیش کو نقشے میں دکھایا ایک

نائب صدر جمہوریہ ہند حامد انصاری مراقش کے دورے پر ہیں ۔ مراقش کے دورے پر انصاری کے استقبال کے لئے خصوصی انتظامات کئے گئے ہیں ، لیکن اس دوران وہاں ان کے استقبال میں لگائے گئے پوسٹروں میں بڑی غلطی نظر آئی ہے ۔

نائب صدر حامد انصاری مراقش کی راجدھانی رباط کی محمد یونیورسٹی میں لیکچردینے والے ہیں، جہاں حامد انصاری کے استقبال میں پوسٹر لگائے گئے، لیکن اس پوسٹر میں ہندوستان کے نقشے میں پاکستان اور بنگلہ دیش کو بھی ہندوستان کا ہی حصہ دکھادیا گیا ۔پوسٹر میں ایک طرف مراقش کا نقشہ ہے تو دوسری طرف ہندوستان کا۔

ہندوستان ، پاکستان اور بنگلہ دیش کے ایک نقشے کو دیکھ کر ہندوستانی افسروں نے اس پر اعتراض کیا، جس کے بعد طلبہ فورا ہی حرکت میں آگئے ۔

کچھ طلبہ نقشہ پر ٹیپ لگاتے ہوئے نظر آئے اور انہوں نے اس غلطی کو چھپانے کے لئے پورے نقشے پر ہی ٹیپ لگا دیا۔

طلبہ کی جانب سے نقشے پر ٹیپ لگانے کے بعد اس پوسٹر میں صرف ایک سفید نشان نظر آرہا تھا۔

خیال رہے کہ مراقش میں نائب صدر حامد انصاری 'انڈیا-مراقش چیمبرس آف کامرس اینڈ انڈسٹری کی لانچنگ کے لئے گئے ہیں۔