وادی کشمیر میں بارہویں جماعت کے امتحانات شروع ، پہلے دن کوئی پیدل پہنچا تو کسی کو گھنٹوں کرنا پڑا انتظار

وادی کشمیر میں پیر کو سخت ترین حفاظتی انتظامات کے درمیان 484 امتحانی مراکز پر بارہویں جماعت کے امتحانات شروع ہوئے۔ اس دوران متفکر والدین جو پبلک ٹرانسپورٹ کی عدم دستیابی کے سبب پیدل چل کر اپنے بچوں کے ساتھ امتحانی مراکز تک پہنچے تھے ، کو امتحانی مراکز کے باہر اپنے بچوں کا انتظار کرتے ہوئے دیکھا گیا۔

طلبہ اور والدین کا کہنا تھا کہ انہیں پبلک ٹرانسپورٹ کی عدم دستیابی کی وجہ سے امتحانی مراکز تک پہنچنے میں شدید مشکلات کا سامنا کرنا پڑا۔

خیال رہے کہ وادی میں 8 جولائی کو حزب المجاہدین کمانڈر برہان وانی کی ہلاکت کے بعد ہڑتال جاری ہے اور وادی بھر میں گذشتہ 129 دنوں کے دوران تقریباً سبھی تعلیمی اداروں میں تعلیمی سرگرمیاں معطل رہیں۔

ایک بارہویں جماعت کے طالب علم کے والد ناصر اسلم نے بتایاکہ پبلک ٹرانسپورٹ کی عدم دستیابی کی وجہ سے ہم صبح سویرے ہی گھر سے نکلے تھے۔ موجودہ حالات میں امتحانات منعقد کرنے سے متعلق ریاستی حکومت کا فیصلہ انتہائی غیرذمہ دارانہ تھا۔

مسٹر اسلم نے مزید بتایا کہ حکومت کو امتحانات کے انعقاد سے قبل معمولات زندگی بحال کرنا چاہیے تھے۔ حکومت نے تو ٹرانسپورٹ کے بھی انتظامات نہیں کئے ہیں‘۔ مختلف مراکز پر اپنے بچوں کے ہمراہ آئے والدین نے بھی ایسے ہی تاثرات کا اظہار کیا۔

زارا اختر نامی ایک خاتون نے یو این آئی کو بتایاکہ ہم خوش قسمت ہیں کہ ہمیں بغیر کسی انتظار کے ایک آٹو رکشا ملا۔ اگرچہ اس نے ہم نے دوگنا کرایہ وصول کیا، لیکن اللہ کا شکر ہے کہ ہم وقت پر امتحانی مرکز تک پہنچنے میں کامیاب ہوئے ۔

تاہم مذکورہ خاتون نے حکومت کی شدید تنقید کرتے ہوئے کہا کہ موجودہ حالات میں امتحانات منعقد کرنے کا واحد مقصد گذشتہ چار ماہ سے زیادہ عرصہ سے جاری ہڑتال کو ختم کرنا ہے‘۔

قابل ذکر ہے کہ وادی میں موجودہ آزادی حامی احتجاجی تحریک کی قیادت کررہے علیحدگی پسند رہنماؤں سید علی گیلانی، میرواعظ مولوی عمر فاروق اور محمد یاسین نے جاری ہڑتال میں 17 نومبر تک توسیع کا اعلان کر رکھا ہے۔

سرکاری ذرائع نے بتایا کہ بارہویں جماعت کے امتحانات میں شامل ہورہے 48 ہزار طلبہ کے لئے 484 امتحانی مراکز قائم کئے گئے ہیں۔ انہوں نے بتایا کہ امتحانات میں بیٹھنے کے لئے 95 سے زیادہ فیصد طلبہ نے ہال ٹکٹیں حاصل کی ہیں۔

ایک رپورٹ کے مطابق بارہویں جماعت کے امتحانات میں 94 فیصد طلبہ شامل ہوئے ہیں۔ مذکورہ رپورٹ کے مطابق صرف 1751 طلباء امتحانات سے غیر حاضر رہے۔